کورونا بحران: ہریانہ میں نافذ لاک ڈاؤن میں 24 مئی تک توسیع

چنڈی گڑھ: ہریانہ میں کورونا کی ابتر صورت حال کے پیش نظر ریاستی حکومت نے لاک ڈاؤن کی مدت میں 24 مئی تک کے لئے توسیع کرنے کا اعلان کیا ہے۔ ہریانہ کے وزیر داخلہ انیل وِج نے اس کی اطلاع دی۔ انہوں نے کہا کہ پابندیوں کو لاگو کرنے کے لئے سخت اقدامات لئے جائیں گے۔

خیال رہے کہ ہریانہ میں اس سے قبل 16 مئی تک لاک ڈاؤں نافذ کیا گیا تھا۔ نئے احکامات کے مطابق ریاست میں اگلے ہفتہ یعنی کہ 17 مئی سے 24 مئی تک لاک ڈاؤن نافذ رہے گا۔ لاک ڈاؤں کے تحت ریاست میں شادی اور آخری رسومات میں 11 سے زیادہ افراد کو جمع ہونے کی اجازت نہیں ہوگی۔ شادی گھر میں یا پھر عدالت میں ہو سکتی ہے، تاہم بارات لے جانے کی اجازت نہیں ہے۔

انیل وج نے بتایا کہ لاک ڈاؤن کے دوران کورونا کے مریضوں کی تعداد میں گراوٹ درج کی گئی ہے۔ ان کے بقول ریاست میں فعال معاملے 116000 سے گھٹ کر 96000 رہ گئے ہیں۔ یومیہ آنے والے نئے مریضوں کی تعداد پہلے 15000 کے قریب تھی جو اب 9600 پر آ گئی ہے۔ انہوں نے کہا کہ وہ مرکزی حکومت سے لگاتار رابطہ میں ہیں اور آکسیجن کی سپلائی میں اضافہ کرنے کا مطالبہ کیا گیا ہے۔

دوسری لہر کے حوالہ سے موجودہ طبی سہولیات پر گفتگو کرتے ہوئے انیل وج نے کہا کہ ’’ابھی جو آکسیجن ہمیں فراہم ہو رہی ہے، اس سے ہم جیسے تیسے گزارا کر رہے ہیں لیکن اگر ہمیں بیڈ بڑھانے ہیں تو آکسیجن کی سپلائی میں بھی اضافہ کرنا ہوگا۔‘‘ خیال رہے کہ ہریانہ میں سب سے پہلے 3 مئی سے 10 مئی تک لاک ڈاؤن نافذ کیا گیا تھا اور بعد میں اس میں 16 مئی تک توسیع کی گئی تھی۔