رام مندر چندہ تنازعہ: کانگریس کا وزیر اعظم مودی پر براہِ راست حملہ، کردار واضح کرنے کا مطالبہ

نئی دہلی: رام مندر چندہ چوری معاملے پر کانگریس نے ایک بار پھر وزیر اعظم نریندر مودی اور مرکزی حکومت کو سخت تنقید کا نشانہ بنایا ہے۔ کانگریس کے رہنما سریندر راجپوت نے پریس کانفرنس سے خطاب کرتے ہوئے الزام عائد کیا کہ رام مندر ٹرسٹ کی تشکیل وزیر اعظم نریندر مودی کی منظوری سے ہوئی تھی، اس لیے ٹرسٹ کے کام کاج اور اس پر لگنے والے الزامات سے وہ اپنی ذمہ داری سے الگ نہیں ہو سکتے۔ انہوں نے مطالبہ کیا کہ وزیر اعظم عوام کے سامنے واضح کریں کہ اس پورے معاملے میں ان کا کوئی کردار ہے یا نہیں۔

سریندر راجپوت نے کہا کہ وزیر اعظم نریندر مودی نے ہی رام مندر کا سنگ بنیاد رکھا اور پران پرتشٹھا کی تقریب میں بھی مرکزی کردار ادا کیا۔ ان کا کہنا تھا کہ ٹرسٹ کی تشکیل بھی وزیر اعظم کی مرضی سے ہوئی اور اس میں ایسے افراد کو شامل کیا گیا جن کا تعلق ایک مخصوص نظریے سے ہے، جبکہ مذہبی شخصیات کو مناسب نمائندگی نہیں دی گئی۔ کانگریس رہنما نے کہا کہ رام مندر کروڑوں عقیدت مندوں کے ایمان اور جذبات سے جڑا معاملہ ہے، اس لیے چندہ چوری جیسے سنگین الزامات سامنے آنے کے بعد وزیر اعظم اپنی ذمہ داری سے دستبردار نہیں ہو سکتے۔

کانگریس نے الزام لگایا کہ چندہ چوری معاملے میں اصل ذمہ داروں کو بچانے کی کوشش کی جا رہی ہے اور چند افراد کو قربانی کا بکرا بنایا گیا ہے۔ پارٹی نے مطالبہ کیا کہ اس معاملے میں وزیر اعظم کے دفتر، راشٹریہ سویم سیوک سنگھ اور وشو ہندو پریشد سے بھی جواب طلب کیا جائے اور اگر ضرورت ہو تو ان سے وابستہ افراد سے بھی پوچھ گچھ کی جائے۔

سریندر راجپوت نے یہ سوال بھی اٹھایا کہ رام مندر ٹرسٹ کو حق اطلاعات قانون کے دائرے سے باہر کیوں رکھا گیا۔ ان کے مطابق اگر ٹرسٹ مکمل طور پر مذہبی ادارہ ہے تو اس میں زیادہ تر ایسے افراد کو کیوں شامل کیا گیا جن کا تعلق بھارتیہ جنتا پارٹی یا راشٹریہ سویم سیوک سنگھ سے بتایا جاتا ہے۔ انہوں نے کہا کہ ان سوالات کے جواب ملک کے عوام کو دیے جانے چاہئیں۔

کانگریس نے خصوصی تحقیقاتی ٹیم کی تشکیل پر بھی اعتراض ظاہر کیا۔ پارٹی کے مطابق اس ٹیم کی سربراہی وجے وشواس پنت کو سونپی گئی ہے، جن کے خلاف پہلے سے دھوکہ دہی اور جعل سازی سے متعلق مقدمات درج ہونے کا دعویٰ کیا گیا۔ کانگریس نے سوال اٹھایا کہ ایسے شخص کو اتنے حساس معاملے کی جانچ کی ذمہ داری کیوں دی گئی۔

پریس کانفرنس کے دوران کانگریس نے رام مندر کی تعمیراتی لاگت پر بھی سوال اٹھائے۔ پارٹی کا کہنا تھا کہ اگر بعض کمپنیوں نے کم لاگت میں تعمیر کی پیش کش کی تھی تو پھر تعمیر پر تقریباً 2100 کروڑ روپے کیسے خرچ ہوئے۔ کانگریس نے یہ بھی دعویٰ کیا کہ عطیہ میں ملنے والے بعض زیورات اور چاندی کی اینٹوں کے بارے میں بھی وضاحت ہونی چاہیے۔ پارٹی نے الزام عائد کیا کہ ٹرسٹ کو مذہبی ادارے کے بجائے سیاسی مرکز بنا دیا گیا، تاہم ان تمام الزامات پر متعلقہ فریقوں کی جانب سے فوری طور پر کوئی ردعمل سامنے نہیں آیا ہے۔