راجیو گاندھی کی سالگرہ کے موقع پر کانگریس کی جانب سے تقاریب کا اہتمام

حیدرآباد: تلنگانہ کانگریس کمیٹی کی جانب سے سابق وزیراعظم راجیو گاندھی کی 76 ویں یوم پیدائش کے موقع پر مختلف تقاریب منعقد کی گئیں۔ پارٹی کے دفتر گاندھی بھون میں راجیو گاندھی کے مجسمہ پر گلہائے عقیدت پیش کیے۔

سوماجی گوڑہ میں راجیو گاندھی کے مجسمہ پر پھول مالا چڑھائی گئی۔ اس موقع پر پی سی سی صدر اتم کمار ریڈی، سی ایل پی لیڈر بھٹی ورکرامارک، کانگریس لیڈران جانا ریڈی، جگا ریڈی، وی ہنمنت راو، لکشمیا، سمپت کمار، ملو روی، عظمی شاکر، فیروز خان اور دوسرے موجود تھے۔

گاندھی بھون میں منعقدہ تقریب سے خطاب کرتے ہوئے پی سی سی صدر اتم کمار ریڈی ایم پی نے کہا کہ 40 سال کی کم عمری میں راجیو گاندھی نے وزیر اعظم کا عہدہ سنبھال کر دنیا کو حیرت میں ڈال دیا۔غیر متوقع حالات میں راجیو گاندھی نے وزیر اعظم کا عہدہ سنبھالا تھا راجیو گاندھی نے ملک کی حکمرانی پر اپنے منفرد نقوش چھوڑے ہیں۔

اتم کمار ریڈی نے کہا کہ راجیو گاندھی وہ رہنما ہیں جنہوں نے 18 سال کی عمر میں نوجوانوں کو قومی تعمیر میں شامل کرنے کے لئے ووٹ ڈالنے کا حق دیا تھا۔ ملک کی ترقی کے لئے سائنس اور ٹیکنالوجی کی اہمیت کو تسلیم کرتے ہوئے اسے فروغ دیا، پنچایت راج نظام کو مضبوط بنانے کے لئے 72 ویں آئینی ترمیم کی۔ راجیو گاندھی اور ان کے خاندان نے اس ملک کے لئے بہت قربانیاں دیں ہیں۔

راجیو گاندھی نے ملک کی سالمیت کے لئے اپنی جان کا نذرانہ پیش کیا۔ مودی حکومت، نہرو خاندان کی طرف سے اس ملک کو دی گئی خدمات کو نظر انداز کرنے کی کوشش کر رہی ہے۔ وزیر داخلہ امت شاہ نے کشمیر مسئلہ پر نہرو کو تنقید کا نشانہ بنایا۔ اتم کمار ریڈی نے کہا کہ ہم سب راجیو گاندھی کے نقش قدم پر چلتے ہوئے آئندہ جی ایچ ایم سی، ورنگل اور کھمم میونسپل انتخابات میں اچھے نتائج حاصل کریں گے۔