’دل بہلانے کو غالب یہ خیال اچھا ہے‘، نریندر مودی کے بلاتعطل 4399 دن وزیر اعظم رہنے والے ریکارڈ پر کانگریس کا طنز

وزیر اعظم نریندر مودی نے اپنے 12 سال مکمل کر لیے ہیں، اور 10 جون کو بطور وزیر اعظم ان کے بلاتعطل 4399 دن بھی ہو گئے۔ اس طرح انھوں نے سابق وزیر اعظم جواہر لال نہرو کے بلاتعطل 4398 دن وزیر اعظم رہنے کے ریکارڈ کو توڑ دیا۔ اس بات کا جشن مودی حکومت کے وزراء اور بی جے پی کے سرکردہ لیڈران پورے جوش کے ساتھ منا رہے ہیں۔ لیکن کانگریس نے اس معاملہ میں وزیر اعظم مودی اور بی جے پی لیڈران پر طنز کیا ہے۔

کانگریس نے اپنے آفیشیل ’ایکس‘ ہینڈل پر ایک تصویر شیئر کر پی ایم مودی کے 12 سال اور بطور وزیر اعظم جواہر لال نہرو کے 12 سال میں بہت بڑا فرق دکھانے کی کوشش کی ہے۔ اس تصویر میں جواہر لال نہرو کھڑے ہوئے ہیں، اور ان کے سامنے پی ایم مودی کھڑے ہیں جو کہ انتہائی پستہ قد نظر آ رہے ہیں۔ پی ایم مودی کہہ رہے ہیں ’’نہرو جی، میں نے آپ کا ریکارڈ توڑ دیا!‘‘ اس تصویر کے ذریعہ طنزیہ انداز میں کانگریس نے ظاہر کرنے کی کوشش کی ہے کہ نریندر مودی کا قد جواہر لال نہرو کے مقابلے انتہائی پستہ ہے۔ تصویر کے ساتھ کیپشن دیا گیا ہے ’’دل بہلانے کو غالب یہ خیال اچھا ہے۔‘‘

کانگریس نے مزید ایک سوشل میڈیا پوسٹ میں پی ایم مودی کے دور کو ملک کے لیے مایوس کن قرار دیا ہے۔ اس میں لکھا گیا ہے کہ ’’12 سال میں نریندر مودی نے پیپر لیک، امتحان کی چوری، ٹنڈر میں دھاندلی کو تحفظ دے کر اسے منظم جرم کا سنڈیکیٹ بنا دیا ہے۔‘‘ ساتھ ہی یہ بھی کہا گیا ہے کہ ’’جب تک ہے مودی حکومت- تب تک ہوتا رہے گا نوجوانوں کا مستقبل نیلام، تب تک چلتا رہے گا پیپر لیک کا کاروبار۔‘‘ پوسٹ کے آخر میں لکھا گیا ہے ’’ہندوستان کا نوجوان اور ’جین زی‘ بہت مایوس اور ناراض ہے۔ اب وہ اپنی زندگی سے کھلواڑ برداشت نہیں کرے گا۔ کانگریس پارٹی سڑک سے پارلیمنٹ تک ان کے ساتھ کھڑی ہے۔‘‘