مکر سنکرانتی کے موقع پر کھڑگے، راہل، پرینکا کی مبارکباد، ہم آہنگی اور خوشحالی کی دعا

نئی دہلی: مکر سنکرانتی کا پُرنور اور بابرکت تہوار بدھ کے روز پورے ملک میں عقیدت اور جوش کے ساتھ منایا جا رہا ہے۔ اس موقع پر کانگریس کی اعلیٰ قیادت اور سینئر رہنماؤں نے سوشل میڈیا پلیٹ فارم ایکس کے ذریعے ملک کے عوام کو دلی مبارکباد پیش کی اور امید، خوشی، یکجہتی اور خوشحالی کے پیغامات دیے۔

کانگریس کے سابق صدر راہل گاندھی نے اپنی پوسٹ میں مکر سنکرانتی کے ساتھ ساتھ ہندوستان کے مختلف خطوں میں منائے جانے والے فصلوں کے تہواروں کا ذکر کرتے ہوئے عوام کو مبارکباد دی۔ انہوں نے کہا کہ یہ تمام تہوار نئے آغاز، امید اور مسرت کی علامت ہیں اور دعا کی کہ یہ تقریبات عوام کی زندگیوں میں خوشی اور خوشحالی لے کر آئیں۔

کانگریس کے صدر ملکارجن کھڑگے نے بھی اپنے پیغام میں ہندوستان کی زندہ دل زرعی روایتوں کا حوالہ دیتے ہوئے کہا کہ جب پورا ملک فصلوں کے تہوار ایک ساتھ مناتا ہے تو فضا شکرگزاری، خوشی اور اتحاد سے بھر جاتی ہے۔ انہوں نے خواہش ظاہر کی کہ مکر سنکرانتی اور اس سے جڑے دیگر تہوار عوام کے لیے صحت مند اور خوشحال مستقبل کا پیغام ثابت ہوں۔

کانگریس رکن پارلیمنٹ پرینکا گاندھی واڈرا نے مکر سنکرانتی اور ماگھ بیہو کے موقع پر عوام کو مبارکباد دیتے ہوئے کہا کہ سورج کے اترائن ہونے اور نئی فصلوں کے استقبال کا یہ موقع ہماری ثقافتی ہم آہنگی اور فطرت سے گہرے رشتے کی علامت ہے۔ انہوں نے دعا کی کہ یہ تہوار سب کی زندگی میں سکون، امن اور خوشحالی کا سبب بنیں۔

خیال رہے کہ مکر سنکرانتی ہندوستان کا ایک اہم اور قدیم تہوار ہے جو سورج کے مکر راشی میں داخل ہونے اور اس کے اترائن ہونے کی علامت ہے۔ یہ تہوار عام طور پر جنوری کے وسط میں منایا جاتا ہے اور اس کا تعلق موسم کی تبدیلی، دنوں کے بڑے ہونے اور فصل کی کٹائی سے ہے۔ مکر سنکرانتی کو زرعی تہذیب میں خاص مقام حاصل ہے کیونکہ اس موقع پر کسان نئی فصل کی خوشی میں شکرگزاری کا اظہار کرتے ہیں۔

ہندو مذہبی روایات کے مطابق اس دن سورج دیوتا کی پوجا، اسنان، دان اور خیرات کو نہایت بابرکت سمجھا جاتا ہے۔ ملک کے مختلف حصوں میں یہ تہوار مختلف ناموں سے منایا جاتا ہے، لیکن اس کا بنیادی پیغام فطرت کے ساتھ ہم آہنگی، محنت کی قدر اور نئے آغاز کی امید ہے۔