راہل گاندھی نے مودی حکومت کو لکھا خط، کیرالہ میں منریگا کا دائرہ بڑھانے کا کیا مطالبہ

سابق کانگریس صدر اور رکن پارلیمنٹ راہل گاندھی نے مودی حکومت میں وزیر برائے دیہی ترقی نریندر سنگھ تومر کو ایک خط لکھا ہے۔ اس خط میں انھوں نے مطالبہ کیا ہے کہ منریگا کے تحت آنے والے کاموں کا دائرہ بڑھایا جائے اور ایک فیملی کے لیے متعین کام کے کم از کم دنوں کو بڑھا کر 200 دن کیا جائے۔ قابل ذکر ہے کہ کیرالہ میں سیلاب کی وجہ سے 100 سے زائد لوگوں کی موت ہو چکی ہے اور ہزاروں کی تعداد میں لوگ اپنا گھر چھوڑ کر دوسرے محفوظ مقامات پر چلے گئے ہیں۔

راہل گاندھی نے 23 اگست کو تحریر کردہ خط میں لکھا ہے کہ ’’کیرالہ میں اس سال آیا سیلاب گزشتہ کچھ دہائیوں کے دوران سب سے زبردست سیلاب ثابت ہوا ہے۔ زبردست بارش، سیلاب اور زمین دھنسنے کی وجہ سے لوگ بے گھر ہو گئے ہیں، اور گھروں میں کیچڑ بھر جانے کے سبب ہزاروں گھر رہنے لائق نہیں رہ گئے ہیں۔‘‘

راہل گاندھی نے کہا ہے کہ ماضی میں وزارت برائے دیہی ترقی نے مہاتما گاندھی گرامین روزگار گارنٹی ایکٹ (منریگا) کے تحت ریاستی حکومت کے ذریعہ ذکر کردہ آفات متاثرہ گاؤں، ترقیاتی ڈویژنوں یا اضلاع کے لیے خصوصی بندوبست کیے تھے۔ انھوں نے مزید کہا کہ ’’اس کے علاوہ منریگا ایکٹ 2005 کی دفعہ (4)3 مرکزی حکومت کو اس بات کا اختیار دیتی ہے کہ وہ روزگار کے مقررہ دنوں کو بڑھا سکتی ہے۔‘‘

قابل ذکر ہے کہ راہل گاندھی نے 11 اگست سے 14 اگست کے درمیان اپنے پارلیمانی حلقہ وائناڈ کا دورہ کیا تھا اور ریاست میں سیلاب راحت و بچاؤ کاموں کا جائزہ لیا تھا۔ انھوں نے سیلاب متاثرین کی مدد کے لیے لوگوں سے اپیل بھی کی تھی۔