کانگریس کی دوسری فہرست جاری، راج ببر اور نانا پٹولے سمیت 21 ناموں کا اعلان

لوک سبھا انتخاب کے لیے کانگریس نے امیدواروں کی دوسری فہرست جاری کر دی ہے۔ مراد آباد سے راج ببر، بہرائچ سے ساوتری پھولے، ناگپور سے نانا پٹولے اور ممبئی نارتھ-سنٹرل سے پریہ دت کو اتارا گیا ہے۔

تصویر سوشل میڈیا
تصویر سوشل میڈیا
user

قومی آوازبیورو

آئندہ لوک سبھا انتخاب کے لیے کانگریس نے 21 امیدواروں کی دوسری فہرست جاری کر دی ہے۔ اس فہرست میں اتر پردیش کی سیٹوں کے لیے 16 نام اور مہاراشٹر کی سیٹوں کے لیے 5 نام بطور پارٹی امیدوار طے کیے گئے ہیں۔ پارٹی نے اتر پردیش کی مراد آباد سیٹ سے ریاستی کانگریس صدر راج ببر اور سابق وزیر داخلہ سشیل کمار شندے کو مہاراشٹر کے شعلہ پور سے میدان میں اتارا ہے۔ وہیں حال ہی میں بی جے پی سے کانگریس میں شامل ہوئیں ساوتری پھولے کو بہرائچ سے ٹکٹ ملا ہے۔

لسٹ میں بڑے ناموں کی بات کریں تو اتر پردیش کی ہائی پروفائل سیٹوں میں سے ایک سلطان پور سیٹ کے سنجے سنگھ کو ٹکٹ دیا گیا ہے۔ جب کہ سابق مرکزی وزیر شری پرکاش جیسوال کو کانپور سیٹ سے اتارا گیا ہے۔ وہیں مہاراشٹر میں پریہ دت کو ممبئی-نارتھ سنٹرل سے اور ملند دیوڑا کو ممبئی جنوب سے میدان میں اتارا گیا ہے۔ وہیں اکھل بھارتیہ کسان کانگریس کے صدر نانا پٹولے کو ناگپور سے ٹکٹ ملا ہے۔ وہ اس سیٹ سے بی جے پی کے نتن گڈکری کو چیلنج پیش کریں گے۔

مکمل فہرست کی بات کریں تو اتر پردیش کی نگینہ (محفوظ) سے اوم وتی دیوی جاٹو، کھیری سے ظفر علی نقوی، سیتا پور سے قیصر جہاں، مشرخ (محفوظ) سے منجری راہی، موہن لال گنج (محفوظ) سے راما شنکر بھارگو، پرتاپ گڑھ سے رتنا سنگھ، فتح پور سے راکیش سچان، سنت کبیر نگر سے پرویز خان، بانس گاؤں سے کُش سوربھ، لال گنج (محفوظ) سے پنکج موہن سونکر، مرزا پور سے للتیش پتی ترپاٹھی اور رابرٹس گنج سے بھگوتی پرساد چودھری کو ٹکٹ دیا گیا ہے۔ دوسری طرف مہاراشٹر کی گڑھ چرولی چمر سیٹ سے ڈاکٹر نامدیو دُلو جی اسیندو کو میدان میں اتارا گیا ہے۔

اس سے قبل کانگریس نے پہلی فہرست میں 15 امیدواروں کے ناموں کا اعلان کیا تھا، جس میں یو پی کی 11 اور گجرات کی 4 سیٹوں کے امیدواروں کے نام کا اعلان کیا گیا تھا۔ پہلی لسٹ میں ہی راہل گاندھی اور سونیا گاندھی کا نام شامل تھا جو اپنی روایتی سیٹوں سے ہی انتخاب لڑیں گے۔

Published: 14 Mar 2019, 9:09 AM
next