عام انتخابات 2019: کانگریس نے جاری کی پانچویں فہرست، ابھیجیت کو بھی ملا ٹکٹ

کانگریس نے لوک سبھا انتخاب کے لیے امیدواروں کی پانچویں فہرست جاری کر دی ہے۔ اس میں اتر پردیش، مغربی بنگال، تلنگانہ، آندھرا پردیش، آسام، اڈیشہ اور لکشدیپ کے لیے امیدواروں کے ناموں کا اعلان کیا گیا ہے۔ اس فہرست میں کل 56 نام ہیں جن میں تین اتر پردیش سے، 11 مغربی بنگال سے، ایک لکشدیپ سے، 7 تلنگانہ سے، 6 اڈیشہ سے، 5 آسام سے اور 23 امیدوار آندھرا پردیش سے ہیں۔

پارٹی نے مغربی اتر پردیش کی میرٹھ سیٹ سے اپنا امیدوار بدل دیا ہے۔ یہاں سے او پی شرما کی جگہ ہریندر اگروال کو اتارا گیا ہے جب کہ غازی آباد سے ڈالی شرما، بلند شہر سے بنشی لال پہاڑیا کو ٹکٹ دیا گیا ہے۔ مغربی بنگال میں سابق صدر پرنب مکھرجی کے بیٹے ابھیجیت مکھرجی کو جانگیر پور اور سابق وزیر اور مغربی بنگال کانگریس صدر رہے ادھیر رنجن چودھری کو برہام پور سے ٹکٹ دیا گیا ہے۔

کانگریس لوک سبھا انتخابات کے پیش نظر مجموعی طور پر اب تک 137 امیدواروں کے ناموں کا اعلان کر چکی ہے۔ اس کے علاوہ کانگریس نے اڈیشہ اسمبلی انتخاب کے لیے 36 اور آندھرا پردیش اسمبلی انتخاب کے لیے 132 امیدواروں کی فہرست بھی جاری کر دی ہے۔