جے پور ضمنی انتخاب: کانگریس نے بی جے پی کو ریکارڈ ووٹوں سے شکست دی

مودی لہر کا پورے ملک سے دھیرے دھیرے خاتمہ ہو رہا ہے اور اس کی تازہ مثال آج جے پور ضمنی انتخاب کا برآمد نتیجہ ہے۔ اس انتخاب میں کانگریس نے بی جے پی کو ریکارڈ ووٹوں سے شکست دے کر ثابت کر دیا کہ گزشتہ کچھ مہینوں میں مختلف یونیورسٹیوں کے انتخابات اور ضمنی انتخابات میں بی جے پی کی شکست کوئی اتفاق نہیں ہے۔ راجستھان میں اسٹوڈنٹ یونین انتخاب میں بی جے پی کی شکست نے مودی لہر کی جو ہوا نکالی تھی جے پور میونسپل کارپوریشن کے 76 نمبر وارڈ پر ہوئے ضمنی انتخاب نے اس کو مزید تقویت دی ہے۔ انتخاب کا نتیجہ برآمد ہونے کے بعد جہاں ایک طرف بی جے پی امیدوار کے ہوش اڑ گئے ہیں وہیں کانگریس خیمہ جشن کے ماحول میں ڈوبا ہوا ہے۔

دراصل جے پور کے 76 نمبر وارڈ پر ہوئے ضمنی انتخاب میں فتح حاصل کرنے کے لیے بی جے پی امیدوار اشوک اگروال نے خوب محنت کی تھی اور اب جب کہ نتیجہ ان کے خلاف آیا ہے تو وہ حیران ہیں۔ اپنی شکست کی ذمہ داری وہ ’مودی مخالف لہر‘ کو دے نہیں سکتے اس لیے پارٹی کے اندر ہو رہی سیاست پر ناراضگی ظاہر کی۔ اپنی شکست کے بعد انھوں نے بی جے پی کے ریاستی صدر سے ملاقات کر کے اپنا غم بھی بیان کیا۔ دوسری طرف کانگریس کے امیدوار اکرام الدین کی فتح کے بعد راجستھان کانگریس کے سبھی سینئر لیڈروں میں خوشی کی لہر دوڑ گئی۔ اکرام الدین نے فتحیابی کے بعد کہا کہ ’’یہ فتح پارٹی کے لیے خوش آئند ثابت ہوگا اور پارٹی کارکنان میں نیا جوش پیدا کرے گا۔‘‘ قابل ذکر ہے کہ اکرام الدین نے بی جے پی امیدوار کو 5 ہزار سے زائد ووٹوں سے شکست دی جو اپنے آپ میں ایک ریکارڈ ہے۔