یو پی میں دلت افسر کی خودکشی پر کانگریس کا اظہار غم، یوگی حکومت پر کیا حملہ

کانگریس نے یو پی میں ایک افسر کے ذریعہ خودکشی کرنے کے واقعہ پر یوگی حکومت کو تنقید کا نشانہ بنایا ہے۔ کانگریس نے ٹوئٹ کر کہا ہے کہ یہ واقعہ بی جے پی حکومت کی بدتر حکمرانی کا نتیجہ ہے۔ کانگریس کا کہنا ہے کہ یوگی حکومت میں اگر ایک افسر کو اپنی زندگی اس قدر محال لگ رہی ہے کہ اسے خودکشی کرنی پڑ رہی ہے، تو پھر عام لوگوں کی کیا حالت ہوگی۔

قابل ذکر ہے کہ اتر پردیش کے لکھیم پور کھیری کے وِکاس کھنڈ گولہ واقع پنچایت میں تعینات دلت افسر برائے دیہی ترقی نے بھارتیہ کسان یونین کے لیڈروں اور پردھانوں سے پریشان ہو کر خودکشی کر لی۔ دلت افسر تریویندر کمار نے ایک خودکشی نوٹ بھی چھوڑا تھا جس میں انھوں نے اپنا درد بیان کیا۔ انھوں نے اس میں بتایا کہ کس طرح ذات پر مبنی الفاظ کا استعمال کر کے انھیں ظلم کا شکار بنایا گیا، اور یہی وجہ ہے کہ انھوں نے خودکشی کا راستہ اختیار کیا۔

خودکشی نوٹ میں تریویندر کمار نے یہ بھی لکھا ہے کہ ’’مجھے کسان یونین اور پردھانوں کے ذریعہ ظلم کا شکار بنایا جا رہا ہے، جس سے میں بہت ہی پریشان ہوں۔ مجھے گالی دیا جاتا ہے، اور ریزرویشن کے خلاف بولا جاتا ہے جو کہ بہت ہی غلط ہے۔ میں اپنی زندگی سے پریشان ہو گیا ہوں۔ میں اپنی فیملی سے بہت پیار کرتا ہوں اور ان پر بھروسہ کرتا ہوں۔ بلاک پر میرا مذاق بنایا جاتا ہے۔ اگر مجھے کچھ ہوتا ہے تو اس کے ذمہ دار صرف کسان یونین پارٹی اور اس کے صدر، رسول پور کے پردھان، دیوریا پردھان کے بیٹے پپو ہی ہیں۔‘‘

خودکشی سے قبل لکھے گئے نوٹ میں تریویندر نے یہ بھی لکھا کہ ’’مجھ پر دماغی طور سے پارٹی اور پردھان کے ذریعہ استحصال کیا جا رہا ہے۔ میں خود سے مایوس ہو گیا ہوں۔ میرے مرنے کے بعد میری فیملی کو کوئی بھی پریشان نہیں کرے گا۔ میں اپنی خود کی خواہش سے مرنے جا رہا ہوں۔ لیکن میرے مر جانے کے بعد پارٹی صدر اور پردھانوں کو سزا ملے، تاکہ یہ کسی اور کو پریشان نہ کر سکیں۔‘‘