گیانیش کمار اور ایس آئی آر کے خلاف کانگریس کی ملک گیر مہم، یکم نومبر کو رام لیلا میدان میں عظیم الشان ریلی

نئی دہلی: کانگریس نے چیف الیکشن کمشنر گیانیش کمار اور ووٹر لسٹوں کی خصوصی گہری نظرثانی (ایس آئی آر) کے خلاف ملک گیر احتجاجی مہم کا اعلان کیا ہے۔ پارٹی نے اس مہم کو ’ووٹ بچاؤ، دیش بچاؤ‘ کا نام دیا ہے۔ اس کے تحت اکتوبر اور نومبر میں مختلف سطحوں پر احتجاج، ریلیاں اور عوامی رابطہ مہم چلائی جائے گی، جبکہ یکم نومبر کو نئی دہلی کے رام لیلا میدان میں انڈیا اتحاد کی عظیم الشان ریلی منعقد کی جائے گی۔

کانگریس صدر ملکارجن کھڑگے اور لوک سبھا میں اپوزیشن لیڈر راہل گاندھی نے پارٹی کے جنرل سیکریٹریوں، ریاستی انچارجز اور ریاستی کانگریس صدور کے ساتھ میٹنگ کی، جس میں الیکشن کمیشن کے خلاف پارٹی کی آئندہ حکمت عملی پر تبادلہ خیال کیا گیا۔ میٹنگ کے بعد کانگریس کے تنظیمی جنرل سیکریٹری کے سی وینوگوپال اور جنرل سیکریٹری جے رام رمیش نے احتجاجی پروگرام کی تفصیلات بتائیں۔

جے رام رمیش نے کہا کہ 6 اکتوبر کو صبح 11 بجے تمام اپوزیشن جماعتوں کے ارکان پارلیمنٹ، پارلیمنٹ ہاؤس سے نرواچن سدن تک مارچ کریں گے۔ اس کے بعد 8 اکتوبر کو انڈیا اتحاد میں شامل تمام جماعتیں ضلع سطح پر احتجاج کریں گی۔ ان مظاہروں میں ووٹوں کی چوری اور چیف الیکشن کمشنر گیانیش کمار کو عہدے سے ہٹانے کا مطالبہ کیا جائے گا۔

انہوں نے بتایا کہ 10 سے 20 اکتوبر تک کانگریس بلاک سطح پر موٹر سائیکل ریلی، سائیکل ریلی اور پیدل مارچ نکالے گی۔ اس کے بعد 25 اکتوبر سے 25 نومبر تک ایک ماہ کی خصوصی مہم چلائی جائے گی، جس کے دوران پارٹی کارکن ریاست، ضلع اور گاؤں کی سطح پر ’ووٹ بچاؤ، دیش بچاؤ‘ ریلیاں منعقد کریں گے اور گھر گھر جا کر ووٹر لسٹوں سے حذف کیے گئے ناموں کو دوبارہ شامل کرانے کی کوشش کریں گے۔

جے رام رمیش کے مطابق کانگریس کے پاس تقریباً 10 لاکھ بوتھ اور تقریباً 13 سے 13.5 کروڑ ووٹروں سے متعلق معلومات موجود ہیں۔ پارٹی کا دعویٰ ہے کہ ان ناموں کو ووٹر لسٹوں سے ہٹایا گیا ہے اور خصوصی مہم کے دوران ان معاملات کو اجاگر کیا جائے گا۔

انہوں نے مزید بتایا کہ یکم نومبر کو رام لیلا میدان میں انڈیا اتحاد کی مہاریلی منعقد ہوگی، جس میں تمام اپوزیشن جماعتوں کو شرکت کی دعوت دی جائے گی۔ اس کے بعد 25 اور 26 نومبر کو 6 مختلف ریاستوں سے ’دہلی چلو‘ یاترا نکالی جائے گی اور دہلی میں ’ووٹ بچاؤ، دیش بچاؤ، سی ای سی ہٹاؤ‘ کے نعرے کے ساتھ بڑا احتجاج کیا جائے گا۔

کے سی وینوگوپال نے کہا کہ کانگریس کا مقصد گیانیش کمار کو عہدے سے ہٹانا اور انتخابی نظام میں اصلاحات کرانا ہے۔ انہوں نے الیکشن کمیشن پر سخت تنقید کرتے ہوئے اسے ’چیٹنگ کمیشن آف انڈیا‘ تک قرار دیا۔ جے رام رمیش نے فارم-6 میں مبینہ تبدیلیوں کا حوالہ دیتے ہوئے الزام لگایا کہ چیف الیکشن کمشنر نے قانون اور آئین کی روح کے ساتھ ’غداری‘ کی ہے۔ کانگریس نے واضح کیا ہے کہ یہ احتجاج محض چند روز کی سرگرمی نہیں بلکہ مسلسل ملک گیر سیاسی مہم کا حصہ ہوگا۔