صارفین کو راحت! کمرشیل ایل پی جی سلنڈر 51 روپے ہوا سستا، نئی شرحیں آج سے نافذ

آج یکم ستمبر کی صبح دہلی سے پٹنہ تک صارفین کو راحت دینے والی خبر آئی ہے اور کمرشیل ایل پی جی سلنڈر تقریباً 51.50 روپے تک سستا ہو گیا ہے۔ آئل مارکیٹنگ کمپنیوں نے ایل پی جی سلنڈر کی نئی شرح جاری کر دی ہے۔ نئی شرح کے مطابق 19 کلو والے ایل پی جی سلنڈر کی قیمت میں کٹوتی کی گئی ہے جبکہ گھریلو گیس سلنڈر یعنی 14 کلو والے ایل پی جی سلنڈر کی قیمت میں کوئی تبدیلی نہیں ہوئی ہے۔

تازہ کٹوتی کے بعد اب راجدھانی دہلی میں ایک کمرشیل گیس سلنڈر کی قیمت کم ہو کر 1580 روپے ہو گئی ہے۔ اس سے پہلے اگست مہینے میں بھی اس کی قیمت گھٹی تھی۔ کولکاتا میں آج سے کمرشیل سلنڈر 1684 روپے میں ملیں گے، اگست میں یہ 1734 اور جولائی میں 1769 روپے میں مل رہا تھا جبکہ جون میں اس کی قیمت 1826 روپے تھی۔ یکم ستمبر یعنی آج سے یہ 50 روپے سستا ہو گیا۔

ممبئی میں اب کمرشیل سلنڈر کی قیمت 1531.50 روپے ہے۔ اگست میں یہ 1582.50 روپے اور جولائی میں 1616 روپے کے تھے۔ جبکہ جون میں 1674.50 روپے میں فروخت ہو رہے تھے۔ مئی میں 1699 روپے میں ملتا تھا۔ آج سے یہاں 51 روپے فی سلنڈر کی کٹوتی کی گئی ہے۔

چنئی کی بات کی جائے تو یہاں کمرشیل سلنڈر کی قیمت یکم ستمبر یعنی آج سے 1738 روپے ہو گئی ہے۔ اگست میں 1789 روپے اور جولائی میں اس کی قیمت 1823.50 روپے تھی جبکہ جون میں 1881 روپے۔ یہاں بھی 51 روپے کی راحت ملی ہے۔

ہندوستان میں انڈین آئل کے ڈاٹا کی بنیاد پر 2025 میں ایل پی جی (لکویفائڈ پٹرولیم گیس) کی قیمتوں کی بات کریں تو گزشتہ ایک سال میں گھریلو ایل پی جی کی قیمتوں میں کچھ اضافہ دیکھا گیا ہے لیکن حال کے مہینوں میں قیمتیں مستحکم ہیں۔ موجودہ ایل پی جی پرائس ڈاٹا کے مطابق گھریلو 14.2 کلوگرام سلنڈر کی قیمت دہلی میں 853 روپے، ممبئی میں 852.50 روپے اور لکھنوں میں 890.50 روپے ہے۔ اگست کی طرح ستمبر میں بھی اس میں کوئی تبدیلی نہیں ہوئی ہے۔

وہیں کمرشیل ایل پی جی کی قیمتوں میں حال کے مہینوں میں کئی کٹوٹی دیکھنے کو ملی ہے۔ جولائی اور اگست میں فی سلنڈر 33 روپے سے 58 روپے کم ہوئے۔ واضح رہے کہ انڈین آئل اور دیگر سرکاری تیل کمپنیاں ہر مہینے نئی قیمتیں طے کرتی ہیں۔