’بی جے پی میں آ جاؤ ورنہ ماما کا بلڈوزر تیار کھڑا ہے!‘ مدھیہ پردیش کے وزیر کی دھمکی

بھوپال: مدھیہ پردیش میں گنا کے راگھوگڑھ میں بلدیہ الیکشن ہو رہا ہے اور دگ وجے سنگھ کے گڑھ راگھوگڑھ میں سیاسی ہلچل تیز ہو رہی ہے۔ دریں اثنا، مدھیہ پردیش حکومت کے کابینہ وزیر مہندر سنگھ سسودیا نے قابل اعتراض بیان دیا۔ انہوں نے بی جے پی امیدوار کی حمایت میں جلسہ سے خطاب کرتے کہا ’’دیکھ لو بھیا! 2023 میں بی جے پی کی حکومت بن رہی ہے۔ اب بھی وقت ہے، بی جے پی میں آجاؤ، ورنہ ماما کا بلڈوزر تیار کھڑا ہے۔‘‘

روٹھیائی میں جلسہ سے خطاب کرتے ہوئے مہندر سنگھ سسودیا نے کہا ’’جو بھی کانگریس کے لوگ ہوں، وہ آہستہ اور خاموشی سے سرک جاؤ۔ کیونکہ 2023 میں بھی بی جے پی کی حکومت بننے والی ہے۔ پھر دیکھ لینا ماما کا بلڈوزر تیار کھڑا ہے۔‘‘ قابل ذکر ہے کہ ریاست میں وزیر اعلی شیوراج سنگھ چوہان کے لیے 'ماما' کے لقب کا استعمال کیا جاتا ہے۔

سسودیا نے مبینہ طور پر یہ بات 20 جنوری کو ہونے والے راگھو گڑھ میونسپل کارپوریشن الیکشن کی مہم کے دوران ایک جلسہ عام میں کہی۔ موقع پر موجود لوگوں نے اس کی ویڈیو بنائی، جوکہ جمعرات کو منظر عام پر آئی اور وائرل ہو گئی۔

خبر رساں ایجنسی پی ٹی آئی کے مطابق گنا ضلع کانگریس کے سربراہ ہری شنکر وجے ورگیہ نے سسودیا کے بیان پر جوابی حملہ کرتے ہوئے کہا کہ وزیر کے بیان سے بی جے پی کی شبیہ خراب ہوئی ہے۔ وجے ورگیہ نے کہا، "انہیں اپنی زبان میں تحمل کا مظاہرہ کرنا چاہیے۔ راگھو گڑھ کے لوگ 20 جنوری کو ہونے والے انتخابات میں انہیں منہ توڑ جواب دیں گے۔"

خیال رہے کہ راگھو گڑھ سینئر کانگریس لیڈر اور راجیہ سبھا ایم پی دگوجے سنگھ کا آبائی شہر ہے اور ان کے بیٹے جے وردھن سنگھ یہاں سے رکن اسمبلی ہیں۔