اتر پردیش میں سردی کی شدت برقرار، آٹھویں تک اسکول بند

لکھنؤ: اتر پردیش میں سرد لہر اور گھنے کہرے کے مسلسل اثرات کے پیش نظر ریاستی انتظامیہ نے اسکولوں کے اوقات اور تعطیلات سے متعلق اہم ہدایات جاری کی ہیں۔ ضلع مجسٹریٹ لکھنؤ کی جانب سے اعلان کیا گیا ہے کہ چھ جنوری سے آٹھ جنوری تک جماعت اول سے آٹھویں تک کے تمام اسکولوں میں تعطیل رہے گی۔ اس کے ساتھ ہی جماعت نو سے بارہویں تک کی کلاسیں صبح دس بجے سے دوپہر تین بجے تک منعقد کی جا سکیں گی۔ بورڈ امتحانات کی تیاری کر رہے طلبہ کے لیے خصوصی انتظامات کرنے کی بھی ہدایت دی گئی ہے، تاکہ ان کی پڑھائی متاثر نہ ہو۔

ہدایات میں کہا گیا ہے کہ ضلع اسکول انسپکٹر اور بیسک شکشا ادھیکاری اس فیصلے پر تمام سرکاری، نجی، رہائشی اور پریشد سے وابستہ اسکولوں میں سختی سے عمل درآمد کرائیں گے۔ اسکول انتظامیہ کو یہ بھی یقینی بنانے کے لیے کہا گیا ہے کہ جہاں کلاسیں چل رہی ہوں وہاں سردی سے بچاؤ کے مناسب انتظامات موجود ہوں۔

ریاست کے بیشتر حصوں میں گزشتہ کئی دنوں سے کڑاکے کی سردی کا سلسلہ جاری ہے۔ سرد پچھوا ہواؤں کے باعث دن اور رات کے درجہ حرارت میں نمایاں کمی درج کی گئی ہے۔ دس سے پندرہ کلومیٹر فی گھنٹہ کی رفتار سے چلنے والی ٹھنڈی ہواؤں نے گلن میں اضافہ کر دیا ہے، جس کے باعث بزرگوں، بچوں اور بیمار افراد کو خاصی مشکلات کا سامنا ہے۔ اگرچہ بعض علاقوں میں دن کے وقت دھوپ نکلنے سے زیادہ سے زیادہ درجہ حرارت میں معمولی اضافہ ہوا ہے، مگر رات کے وقت شدید ٹھنڈ برقرار ہے۔

محکمہ موسمیات کے مطابق آئندہ چند دنوں میں ریاست کے بیشتر اضلاع میں دن کے درجہ حرارت میں دو سے تین ڈگری سیلسیس تک اضافہ ہو سکتا ہے، تاہم رات کے درجہ حرارت میں کسی بڑی تبدیلی کا امکان نہیں ہے۔ ماہرین کا کہنا ہے کہ ہوا کی رفتار میں اضافے کے باعث کئی علاقوں میں کہرے کا اثر کچھ کم ہو سکتا ہے، لیکن ترائی اور مشرقی حصوں کے بعض اضلاع میں صبح کے وقت گھنا کہرا چھائے رہنے کے امکانات برقرار ہیں۔

موسمی رپورٹ کے مطابق پیر کے روز ایٹاوہ ریاست کا سب سے سرد مقام رہا، جہاں کم سے کم درجہ حرارت دو اعشاریہ چار ڈگری سیلسیس ریکارڈ کیا گیا۔ بہرائچ میں درجہ حرارت تین ڈگری اور گورکھپور میں پانچ ڈگری سیلسیس تک گر گیا۔ صورتحال کو دیکھتے ہوئے محکمہ موسمیات نے کئی اضلاع کے لیے گھنے کہرے کا ییلو الرٹ جاری کیا ہے۔ انتظامیہ نے عوام سے اپیل کی ہے کہ وہ غیر ضروری طور پر صبح اور رات کے وقت سفر سے گریز کریں اور بچوں و بزرگوں کو سردی سے محفوظ رکھنے کے لیے مناسب احتیاطی تدابیر اختیار کریں۔