ہماچل میں سردی کا قہر، روہتانگ میں برف باری، منالی-لیہہ ہائی وے بند

ہماچل پردیش میں زبردست سردی ہو رہی ہے اور وہاں کئی علاقوں میں برف باری کی خبر ہے۔ وہاں کی کئی شاہ راہیں امتاثر ہو گئی ہیں جس کی وجہ ان علاقوں میں بر ف باری بتائی جا رہی ہے۔ خاص طور سے منالی لیہہ ہائی وے بند کر دیا گیاہے۔

لاہول سپتی کے کوکمسیری میں رات کا سب سے کم درجہ حرارت منفی 6.2 ڈگری سیلسیس ریکارڈ کیا گیا۔ تابو ، کفری،اور روہتانگ میں 43-44 کلومیٹر فی گھنٹہ کی رفتار سے تیز ہوائیں چلیں۔ دوسری طرف برتھین سب سے زیادہ گرم رہا جہاں ایک دن کا درجہ حرارت 25.4 ڈگری سیلسیس تھا۔ اس دوران منڈی ہلکی دھند کی لپیٹ میں رہا۔ محکمہ موسمیات (آئی ایم ڈی) نے منگل کو بلاس پور کے بھاکڑا ڈیم علاقے اور منڈی میں بلہ ویلی کے کچھ حصوں میں گھنی دھند کے لیے یلو الرٹ جاری کیا۔

شملہ موسمیاتی مرکز کے مطابق، ہماچل میں یکم اکتوبر سے معمول سے 45 فیصد زیادہ بارش ہوئی ہے۔ اس دوران 69.5 ملی میٹر بارش ریکارڈ کی گئی جبکہ معمول کی بارش صرف 47.8 ملی میٹر ہے۔ سردیوں کا موسم شروع ہو چکا ہے اور آنے والے دنوں میں اونچائی والے علاقوں میں مزید برف باری متوقع ہے۔ سیاح کرسمس اور نئے سال کی چھٹیوں میں برف سے لطف اندوز ہونے کے لیے منالی آتے ہیں، لیکن سڑک بند ہونے سے لداخ جانے والوں کو انتظار کرنا پڑے گا۔