ہماچل کے منڈی میں پھر پھٹا بادل، شدید بارش کے بعد ملبے میں دھنس گئے گھر اور گاڑیاں، 3 کی موت

ہماچل پردیش کے منڈی ضلع میں ایک بار پھر بادل پھٹنے کا معاملہ سامنے آیا ہے۔ یہاں بادل پھٹنے کے بعد ندی-نالے اُپھان پر ہیں۔ وہیں پانی کے سیلاب سے ہر طرف تباہی کا منظر دیکھنے کو مل رہا ہے۔ حادثے میں 3 لوگوں کی موت ہو گئی ہے جبکہ 2 لاپتہ ہیں۔ اطلاع کے مطابق صبح 4 بجے شدید بارش کے بعد سیلاب آ گیا۔ نالے میں آئے اپھان سے کئی گاڑیاں بہہ گئیں، وہیں سیلاب کی زد میں آنے سے کئی گھر بھی ٹوٹ گئے۔

بتایا جاتا ہے کہ دیر رات منڈی میں بادل پھٹنے سے کئی علاقوں میں ملبہ آ گیا۔ پورے علاقے میں سیلاب جیسے حالات بن گئے۔ پانی کا بہاؤ اتنا تیز تھا کہ کئی گاڑیاں اس کی زد میں آ گئیں۔ سڑکوں پر ملبہ بھر گیا جس سے شہر کے راستے بند ہو گئے۔ گھروں سے لے کر دکانوں تک میں ملبہ گھس گیا ہے۔ سیلاب میں لاپتہ 2 لوگوں کی تلاش کے لیے ریسکیو آپریشن چلایا جا رہا ہے۔

منڈی میں آئے سیلاب کے بعد انتظامیہ راحت و بچاؤ کام میں لگ گئی ہے۔ ملبے میں پھنسی گاڑیوں کو نکالنے کا کام جاری ہے۔ وہیں انتظامیہ نے لوگوں کو گھروں میں رہنے کی صلاح دی ہے۔

ہماچل پردیش کے وزیر اعلیٰ سکھوندر سنگھ سکھو نے بادل پھٹنے کے واقعہ پر افسوس کا اظہار کرتے ہوئے اسے دردناک بتایا۔ سوشل میڈیا سائٹ ’ایکس‘ پر کیے گئے اپنے ٹوئٹ میں انہوں نے کہا کہ لاپتہ لوگوں کی تلاش کے لیے بچاؤ دستہ جنگی پیمانے پر کام کر رہا ہے۔ کئی گاڑیاں ملبے میں دب گئی ہیں۔ انتظامیہ پوری طرح مستعد ہے اور بچاؤ کام کو تیزی سے کرنے کی ہدایت دی گئی ہے۔

وزیر اعلیٰ سکھو نے کہا کہ وہ خود حالات پر نظر بنائے ہوئے ہیں اور سبھی ضروری امداد فوراً دستیاب کرائے جا رہے ہیں۔ انہوں نےر احت کاموں میں لگے مقامی لوگوں کا شکریہ ادا کرتے ہوئے کہا کہ ریاستی حکومت اس مشکل وقت میں متاثرین کے ساتھ مضبوطی سے کھڑی ہے۔

وہیں ہماچل پردیش اسمبلی میں اپوزیشن رہنما جے رام ٹھاکر نے بتایا کہ بارش کی وجہ سے منڈی شہر میں کافی نقصان ہوا ہے۔ کل رات بھر شدید بارش ہوئی۔ یہاں نقصان 3.30 سے 4 بجے کے درمیان ہوا۔ اب تک ملی اطلاع کے مطابق 3 لاشیں برآمد ہوئی ہیں۔ این ڈی آر ایف کی ٹیمیں یہاں پہنچ گئی ہیں۔ راحت کام جاری ہے۔ انہوں نے انتظامیہ اور حکومت سے گزارش کی کہ جلد سے جلد اس بحرانی حالت سے نکلنے کے لیے اقدامات کرے۔