نتیش کے لیے مصیبت بنے چراغ پاسوان، کھلا خط لکھ کر ووٹروں کو دی نصیحت

ایل جے پی سربراہ چراغ پاسوان بہار کے وزیر اعلیٰ نتیش کمار کے پیچھے پڑ گئے ہیں۔ انھوں نے بہار کے نام ایک کھلا خط لکھ کر کہا ہے کہ "جے ڈی یو کو ایک بھی ووٹ دیا تو آپ کے بچے ہجرت کو مجبور ہو جائیں گے۔"

تصویر سوشل میڈیا
تصویر سوشل میڈیا
user

تنویر

این ڈی اے سے آدھا ادھورا ناطہ توڑنے کے بعد لوک جن شکتی پارٹی (ایل جے پی) سربراہ چراغ پاسوان نے پیر کے روز بہار کے لوگوں کو ایک کھلا خط لکھا ہے۔ خط میں کسی بھی حالات میں شکست نہیں ماننے کا دعویٰ کیا گیا ہے۔ خط میں جے ڈی یو امیدواروں کو ووٹ نہیں دینے کی خصوصی طور پر اپیل کی گئی اور کہا گیا ہے کہ جے ڈی یو امیدوار کو دیا گیا ایک بھی ووٹ کل آپ کے بچے کو ہجرت کرنے پر مجبور کرے گا۔

چراغ نے اپنے خط میں 'بہار فرسٹ-بہاری فرسٹ' کی سوچ نہیں مٹنے دوں گا، کی بات کرتے ہوئے لکھا کہ "پاپا کا حصہ ہوں، کبھی بھی حالات سے شکست نہیں مانوں گا اور نہ ہی کسی بھی قیمت پر 'بہار فرسٹ-بہاری فرسٹ' کی سوچ کو مٹنے دوں گا۔" انھوں نے خط میں این ڈی اے سے باہر نکلنے کے اپنے فیصلے کو درست ٹھہراتے ہوئے لکھا ہے کہ یہ فیصلہ بہار پر راج کرنے کے لیے نہیں، بلکہ ناز کرنے کے لیے لیا گیا ہے۔ انھوں نے آگے لکھا ہے کہ "پاپا نے مجھے ہمیشہ کہا ہے کہ کبھی بھی تنہا چلنے سے مت گھبرانا، اگر راستہ اور مقصد ٹھیک ہوگا تو لاکھوں لوگ تمھارے ساتھ آئیں گے۔ پاپا ممی اور آپ سبھی کی دعاؤں سے ابھی طویل سفر طے کرنا ہے، ابھی اور تجربہ حاصل کرنا ہے۔"

چراغ پاسوان نے آئندہ بہار اسمبلی انتخابات کے تعلق سے خط میں لکھا ہے کہ "بہار ریاست کی تاریخ کا یہ بڑا نتیجہ خیز لمحہ ہے۔ 12 کروڑ بہاریوں کی زندگی اور موت کا سوال ہے، کیونکہ اب ہمارے پاس کھونے کے لیے مزید وقت نہیں ہے۔" انھوں نے خط میں دعویٰ کرتے ہوئے کہا کہ ایل جے پی کی راہ آسان نہیں ہے، لیکن لڑیں گے بھی اور جیتیں گے بھی۔ خط کے آخر میں انھوں نے اپنے کارکنان سے پوری طاقت سے متحد ہونے اور ایل جے پی کے امیدواروں کو جتانے کی اپیل کی ہے۔

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔