یوپی: فیس نہ دینے پر بریلی کے اسکول میں بچوں کو بنایا گیا یرغمال، والدین کا ہنگامہ

بریلی: ہارٹ مین اسکول میں تقریباً 35 بچوں کو فیس ادا نہ کئے جانے پر یرغمال بنائے جانے کے بعد والدین کی یونین نے اسکول کے عہدیداران کے خلاف شکایت درج کرانے کا فیصلہ کیا ہے۔ رپورٹ کے مطابق اسکول انتظامیہ نے ہفتہ کے روز ان بچوں کو کرمے میں بند کر دیا، جن کی فیس ادا نہیں کی گئی تھی۔

اسکول کے وقت کے بعد جب والدین اور سرپرست اپنے بچوں کو لینے کے لئے اسکول پہنچے تو انہیں بچوں کو کمرے میں بند کئے جانے کا علم ہوا۔ اس کے بعد اسکول میں والدین نے کافی ہنگامہ کیا۔ اس کے بعد بھی جب اسکول کے ذمہ داروں نے بچوں کو جانے نہیں دیا تو والدین نے پولیس کو فون کر گہار لگائی۔

پولیس کی مداخلت کے بعد بچوں کو پرنسپل کے دفتر سے باہر نکالا گیا۔ بچے کافی گھبرائے ہوئے تھے اور ان میں سے کچھ تو رو بھی رہے تھے۔ اسکول انتظامیہ نے اس تعلق سے کی گئی کال کا جواب نہیں دیا۔

والدین یونین کے صدر انکور سکسینہ نے کہا کہ انہیں معاملہ اطلاع موصول ہو گئی ہے اور اس معاملہ پر خصوصی اجلاس طلب کیا گیا ہے۔ تمام پہلوؤں پر بات کرنے کے بعد اس معاملہ کی شکایت پولیس میں درج کرائی جائے گیل تھانہ عزت نگر کے انسپکٹر سنجے کمار نے کہا کہ اسکول کے خلاف تاحال کوئی معاملہ درج نہیں کیا گیا ہے۔