’وزیر اعلیٰ کو بلایا جائے‘، کانگریس نے شیئر کی لکھنؤ میں جین-الفا کے احتجاجی مظاہرہ کی ویڈیو

اتر پردیش کی راجدھانی لکھنؤ میں اسکولی طلبا کے احتجاج کا معاملہ سرخیوں میں ہے۔ کانگریس نے اپنے آفیشیل ’ایکس‘ ہینڈل پر جاری ایک پوسٹ میں اس احتجاجی مظاہرہ کی ویڈیو بھی شیئر کی ہے۔ پوسٹ میں کانگریس نے دعویٰ کیا ہے کہ جین-الفا بچے سڑکوں پر اتر کر اپنے حقوق کا مطالبہ کر رہے ہیں اور ’وزیر اعلیٰ کو بلایا جائے‘ کے نعرے لگا رہے ہیں۔

کانگریس نے اپنی پوسٹ میں لکھا ہے کہ احتجاج کرنے والی طالبات نے اسکولوں میں بنیادی سہولیات اور تعلیمی نظام سے متعلق کئی شکایات سامنے رکھی ہیں۔ ان کے مطابق اسکولوں میں اساتذہ کی شدید کمی ہے، بورڈ امتحانات کی مناسب تیاری نہیں کرائی جا رہی، بچوں کو ناقص کھانا دیا جاتا ہے اور بیمار پڑنے کی صورت میں علاج کی سہولت بھی دستیاب نہیں ہوتی۔ کانگریس کے مطابق احتجاج کرنے والی طالبات کا کہنا ہے کہ اساتذہ کی کمی کا براہ راست اثر تعلیم پر پڑ رہا ہے اور پڑھائی میں شدید مشکلات کا سامنا کرنا پڑتا ہے۔

طالبات نے یہ بھی شکایت کی کہ بورڈ امتحانات کی تیاری مناسب طریقے سے نہیں کرائی جا رہی۔ ایسے وقت میں جب طلبا کے لیے امتحانات تعلیمی مستقبل کے اعتبار سے اہم ہوتے ہیں، تدریسی عملے کی کمی اور تیاری کے مناسب انتظام نہ ہونے پر سوال اٹھائے جا رہے ہیں۔ کانگریس نے اپنی پوسٹ میں طلبا کے کھانے اور صحت سے متعلق مسائل کا بھی ذکر کیا۔ کانگریس نے ان شکایات کو اسکولوں میں موجود بنیادی سہولیات کی صورت حال سے جوڑتے ہوئے اتر پردیش کی بی جے پی حکومت پر شدید تنقید کی۔

کانگریس نے بی جے پی حکومت کو نشانہ بناتے ہوئے کہا کہ حکومت کی جانب سے متعدد دعوے کیے جاتے ہیں، لیکن ہر طرف بدانتظامی پھیلی ہوئی ہے۔ معاملہ صرف تعلیم کا نہیں ہے بلکہ اسکولوں میں بچے بنیادی سہولیات تک کے لیے ترس رہے ہیں۔ کانگریس نے اپنی پوسٹ میں الزام لگایا کہ حکومت کے لیے اقتدار ہی سب کچھ رہ گیا ہے اور ملک کے مستقبل کی فکر نہیں ہے۔ پارٹی نے سخت لہجے میں کہا کہ بی جے پی حکومت کی آنکھوں میں شرم کا پانی تک خشک ہو چکا ہے اور اسے صرف اقتدار دکھائی دیتا ہے، ملک کا مستقبل نہیں۔