غلاظت نکالنے والے 8 مزدوروں سے متعلق وزیر اعلیٰ ریکھا گپتا کا بیان بی جے پی کی دلت مخالف ذہنیت کا مظہر: دیویندر یادو

نئی دہلی: دہلی پردیش کانگریس کے صدر دیویندر یادو نے دہلی کے لیفٹیننٹ گورنر ونئے کمار سکسینہ کو ایک خط لکھا ہے۔ اس خط میں انھوں نے دہلی میں مینوئل اسکوینجنگ پر پابندی کے باوجود اس کی خلاف ورزی سرکاری محکموں کے ذریعہ کیے جانے کی اطلاع دی ہے۔ انھوں نے افسوس ظاہر کرتے ہوئے بتایا ہے کہ مینوئل اسکوینجنگ کے تحت روہنی ضلع میں جبراً 8 مزدوروں سے ہاتھ سے غلاظت نکالنے کا کام لیا جا رہا ہے۔

اپنے خط میں دیویندر یادو نے لیفٹیننٹ گورنر کو مخاطب کرتے ہوئے لکھا ہے کہ ’’ہم آپ کی توجہ متوجہ کرنا چاہتے ہیں، کیونکہ یہ غریب لوگوں سے جڑا معاملہ ہے، جنھیں اپنے ذریعہ معاش  کے لیے یہ کام کرنا پڑتا ہے۔‘‘ انھوں نے بتایا ہے کہ مینوئل اسکیونجر اور اس کے بازآبادکاری ایکٹ 2013 کی خلاف ورزی دہلی میں کی جا رہی ہے، جس کے لیے حکومت ذمہ دار ہے اور متعلقہ افسران کے خلاف کارروائی کی جانی چاہیے۔ خط میں یہ بھی لکھا ہے کہ بی جے پی 100 دنوں کا ڈنکا پیٹ رہی ہے، لیکن ریکھا گپتا حکومت نے دلتوں کی ترقی کے لیے کوئی مثبت قدم نہیں اٹھایا ہے۔

دیویندر یادو کا کہنا ہے کہ حیران کرنے والی بات یہ ہے کہ مینوئل اسکوینجنگ کو وزیر اعلیٰ ریکھا گپتا کے ذریعہ مناسب ٹھہرایا گیا تھا۔ انھوں نے کہا تھا کہ ’ایسی جگہ، جہاں مشینیں نہیں پہنچ سکتی ہیں، وہاں مینوئل اسکوینجنگ کے ذریعہ ہی کام ہوگا‘۔ دہلی کانگریس صدر نے کہا کہ یہ تو عدالت عظمیٰ کے حکم کی واضح خلاف ورزی ہے۔ ساتھ ہی وزیر اعلیٰ ریکھا کے بیان سے بی جے پی کی دلت اور دبے کچلے لوگوں کے خلاف ذہنیت ظاہر ہوتی ہے۔ انھوں نے مزید کہا کہ روبوٹ اور اے آئی کے اس دور میں یہ قابل مذمت ہے کہ ہندوستان کی عدالت عظمیٰ کے ذریعہ واضح طور پر پابندی کے لیے ایکٹ بنانے کے باوجود غریب لوگوں کو اس طرح کے خطرناک کام کرنے کے لیے مجبور کیا جاتا ہے۔

دیویندر یادو نے لیفٹیننٹ گورنر کو لکھے اپنے خط میں کہا کہ بغیر کسی حفاظتی وسائل کے مینوئل اسکوینجنگ کا خطرناک کام کرنے کے لیے بے بس لوگوں سے کام کروانا غیر اخلاقی ہے۔ انھوں نے لیفٹیننٹ گورنر سے اپیل کی کہ پولیس کو دہلی کے محکمہ تعمیرات عامہ کے افسران کے خلاف ایف آئی آر درج کرنے کی ہدایت دے کر سخت کارروائی کریں اور روہنی میں مینوئل اسکویجنگ کا کام کرنے والے مزدوروں کو مناسب معاوضہ دینے کے لیے پی ڈبلیو ڈی کو حکم صادر کریں۔