چھتیس گڑھ: ای وی ایم کی پہریداری پر تعینات کانگریسی کارکن کی موت

چھتیس گڑھ میں پردیش کانگریس کمیٹی کے سربراہ بھوپیش بگھیل نے ای وی ایم میں گڑبڑی کو روکنے کی غرض سے اسٹرانگ روم کے باہر کانگریسی کارکنان کو تعینات کیا ہو اہے ۔ اس دوران جسپور سے خبر آئی ہے کہ وہاں کے اسٹرانگ روم کے باہر تعنیات ایک کانگریسی کارکن کی اچانک طبعیت بگڑگئی جس کے بعد اس کا انتقال ہو گیا ۔

ریاست میں ہوئے اسمبلی انتخابات کے بعد سے امیدوار اپنے کارکنان کے ساتھ اسٹرانگ روم کے باہر بیٹھے ہوئے ہیں ، جہاں ووٹنگ کے بعد سے ای وی ایم رکھی ہوئی ہیں۔ کانگریس نے یہ قدم اس لئے اٹھایا ہے کہ کہیں کوئی ان مشینوں میں گڑ بڑی نہ کرے۔

ذرائع کے مطابق جسپور میں کانگریسی کارکن پنکج ہفتہ کی رات اسٹرانگ روم کے باہر مشینوں کی رکھوالی کر رہا تھا کہ اتوار کی صبح اچانک اس کی طبعیت بگڑگئی جس کے بعد اسے جسپور کے ضلع اسپتال میں داخل کرایا گیا لیکن وہاں بھی اس کی حالت بہتر نہیں ہوئی ۔ یہ دیکھتے ہوئے وہاں کے ڈاکٹروں نے اس کو امبیکا پور کے ہولی کراس اسپتال میں ریفر کر دیا ، لیکن اسپتال لے جاتے وقت راستے میں ہی اس کا انتقال ہو گیا ۔

واضح رہے حکمراں جماعت پر انتخابات میں ای وی ایم کے ساتھ گڑبڑی کے الزامات لگتے رہے ہیں ۔ حزب اختلاف یہ مطالبہ کرتا رہا ہے کہ ای وی ایم کو ختم کر کے اس کی جگہ بیلٹ پیپر سے چناؤ کرائے جانے کا مطالبہ کررہے ہیں۔