کابینہ میں شامل نہ کیے جانے پر چھگن بھجبل کے حامیوں کا ہنگامہ

سینئر این سی پی رہنما چھگن بھجبل کے حامیوں نے مہاراشٹر حکومت کی کابینہ میں ان کو  جگہ نہ دیے جانے پر ہنگامہ کیا۔ بھجبل کے حامیوں نے ناسک میں این سی پی دفتر کے باہر ٹائر جلائے۔ اتوار کو وزیر اعلی دیویندر فڑنویس کابینہ کے وزراء نے حلف لیا۔

نئی مہایوتی حکومت میں 39 وزیر بنائے گئے ہیں۔ اس میں بی جے پی کے کوٹے سے 19 وزیر بنائے گئے ہیں، شیوسینا شندے گروپ کے کوٹے سے 11 وزیر بنائے گئے ہیں جبکہ این سی پی اجیت پوار کے کوٹے سے نو وزیر بنائے گئے ہیں۔ این سی پی کے سینئر رہنما چھگن بھجبل ان نو وزراء میں شامل نہیں تھے۔ جس کی وجہ سے ان کے حامی ناراض ہیں۔

اس سے پہلے چھگن بھجبل نے اتوار کو ناگپور میں ہونے والی پارٹی میٹنگ  میں بھی حصہ نہیں لیا ۔ بھجبل صرف ہوٹل میں ٹھہرے تھے۔ تاہم انہوں نے کابینہ میں شامل نہ کیے جانے کے سوال کا کوئی جواب نہیں دیا۔

دوسری طرف جب ریاست کے نائب وزیر اعلیٰ اور این سی پی سربراہ اجیت پوار سے چھگن بھجبل کو کابینہ میں جگہ نہ دینے کے بارے میں سوال کیا گیا تو انہوں نے اس پر کچھ بھی کہنے سے انکار کردیا۔ تاہم اجیت پوار نے واضح کیا کہ ان کی پارٹی کے تمام ایم ایل اے جنہیں وزیر بنایا گیا ہے وہ صرف ڈھائی سال تک حکومت میں رہیں گے۔ ڈھائی سال کے بعد دیگر ارکان اسمبلی  کو موقع دیا جائے گا۔

این سی پی کے 9  ارکان اسمبلی کو وزراء کے عہدے کا حلف دلایا گیا ہے۔ ان میں حسن مشرف، دھننجے منڈے، دتاتریہ بھرنے، ادیتی تٹکرے کو وزیر بنایا گیا ہے۔ مہاراشٹر میں اسمبلی انتخابات کے نتائج کا اعلان 23 نومبر کو ہوا تھا۔ مہایوتی اتحاد نے ریاست کی 288 میں سے 230 سیٹوں پر زبردست کامیابی حاصل کی تھی۔