کیا دہلی میں گریپ-4 نافذ ہو گیا ہے؟ سی اے کیو ایم نے واضح کی صورتحال

قومی راجدھانی دہلی اور این سی آر کے مختلف علاقوں میں فضائی آلودگی کی بلند سطح کے درمیان کچھ ٹی وی چینلوں اور سوشل میڈیا پلیٹ فارمز پر یہ دعویٰ گردش کر رہا تھا کہ حکومت نے گریڈیڈ رسپانس ایکشن پلان (گریپ) کے چوتھے مرحلے کو نافذ کر دیا ہے۔ اس صورتحال پر کمیشن فار ایئر کوالٹی منیجمنٹ (سی اے کیو ایم) نے واضح کیا ہے کہ یہ تمام دعوے بے بنیاد ہیں اور اس وقت پورے این سی آر میں صرف گریپ کا تیسرا مرحلہ نافذ ہے۔ کمیشن کے مطابق نہ کسی نئے مرحلے کا اعلان ہوا ہے اور نہ ہی موجودہ نظام میں کوئی تبدیلی کی گئی ہے۔

سی اے کیو ایم نے اپنی وضاحت میں کہا کہ کچھ پلیٹ فارمز پر غیر مصدقہ معلومات اس انداز سے پیش کی جا رہی ہیں جن سے شہریوں میں غلط فہمی اور بے چینی پیدا ہو رہی ہے۔ کمیشن نے شہریوں، اداروں اور مقامی انتظامیہ کو مشورہ دیا کہ آلودگی سے متعلق کسی بھی ہدایت، پابندی یا مرحلے کی تبدیلی کے بارے میں صرف کمیشن کے سرکاری اعلانات، نوٹیفکیشن اور پریس ریلیز پر ہی انحصار کیا جائے۔ کمیشن کے مطابق غیر مستند خبروں کا پھیلاؤ عملی تیاریوں اور انتظامی فیصلوں میں الجھن پیدا کرتا ہے، جس کا براہ راست اثر عوامی سطح پر ہونے والے اقدامات پر پڑتا ہے۔

یاد رہے کہ 11 نومبر کو دہلی اور این سی آر کے متعدد اضلاع میں گریپ کا تیسرا مرحلہ نافذ کیا گیا تھا، جو اس وقت استعمال میں لایا جاتا ہے جب فضائی معیار ’سیویئر‘ یعنی شدید آلودہ سطح تک پہنچ جائے۔ تیسرے مرحلے کے تحت تعمیراتی سرگرمیوں، صنعتی کاموں اور مخصوص زمرے کی گاڑیوں پر مختلف نوعیت کی پابندیاں عائد کی جاتی ہیں تاکہ فضا میں شامل ہونے والے ذرات اور آلودہ مادوں کے اخراج کو کم کیا جا سکے۔

تیسرے مرحلے کے نفاذ کے بعد نوئیڈا میں میٹرو، اسپتالوں اور فلائی اوور سے متعلق ضروری سرکاری تعمیراتی منصوبوں کو چھوڑ کر تمام غیر ضروری تعمیراتی سرگرمیوں پر مکمل پابندی لگا دی گئی ہے۔ حکام کا کہنا ہے کہ تعمیراتی مقامات سے اٹھنے والی دھول فضا میں ذراتی آلودگی کا سب سے بڑا ذریعہ ہے، اس لیے پابندی ناگزیر تھی۔ شہر میں بی ایس-3 پٹرول اور بی ایس-4 ڈیزل والی چار پہیہ گاڑیوں کے استعمال پر بھی روک جاری ہے۔

اس کے علاوہ نوئیڈا میں آر ایم سی پلانٹ، اسٹون کرشر اور عمارتوں کے انہدام سے متعلق سرگرمیوں کو بھی اگلے حکم تک بند رکھنے کا فیصلہ کیا گیا ہے۔ ماہرین کے مطابق یہ ذرائع فضا میں پی ایم 10 اور پی ایم 2.5 کی بڑی مقدار شامل کرتے ہیں، جو صحت کے لیے انتہائی نقصان دہ ثابت ہوتے ہیں۔

سی اے کیو ایم نے کہا کہ اگر مستقبل میں کسی مرحلے کے اضافے یا تبدیلی کا فیصلہ کیا جاتا ہے تو اس کی باضابطہ اطلاع کمیشن ہی فراہم کرے گا۔ شہریوں سے اپیل کی گئی ہے کہ وہ غیر مصدقہ خبروں پر توجہ نہ دیں اور سرکاری ہدایات پر عمل کرتے ہوئے آلودگی میں کمی کے لیے تعاون جاری رکھیں۔