عیدالاضحی کے موقع پاکستان اور ہندوستان کے درمیان مٹھائیوں کا تبادلہ

عید الاضحی کے موقع پر ہندوستان کی طرف سے بارڈر سیکورٹی فورس (بی ایس ایف) اور پاکستان کی طرف سے پاک رینجرز نے اتوار کو مختلف سرحدی چوکیوں پر انتہائی خوشگوار ماحول میں مٹھائیوں کا تبادلہ کیا۔

جموں سرحد کے تحت مختلف سرحدی چوکیوں پر انتہائی خوشگوار ماحول میں مٹھائیوں کا تبادلہ ہوا جس میں دونوں ممالک کے فوجیوں نے حصہ لیا۔ مرکز کے زیر انتظام علاقے کے سانبا، کٹھوعہ، آر ایس پورہ اور اکھنور سرحد کے ساتھ واقع چوکیوں پر مٹھائیوں کا تبادلہ کیا گیا۔

بی ایس ایف نے رینجرز کو مٹھائیاں پیش کی اور جواب میں پاک رینجرز نے بھی بی ایس ایف کے جوانوں کو مٹھائیاں کھلائیں۔

بی ایس ایف سرحد پر مؤثر طریقے سے غلبہ حاصل کرتے ہوئے سرحد پر پرامن اور خوشگوار ماحول پیدا کرنے میں ہمیشہ پیش پیش رہا ہے۔

اس طرح کی تقریبات دونوں سرحدوں کی حفاظت کرنے والی افواج کے درمیان سرحد پر پرامن ماحول اور خوشگوار تعلقات بنانے میں مدد کرتی ہیں۔ ویسے تو ہر سال مختلف تہواروں پر دونوں ممالک کے فوجی ایک دوسرے کو مٹھائیاں پیش کرتے ہیں۔