اے آئی ایم آئی ایم کارپوریٹر کی حمایت سے امراوتی میں جیتی بی جے پی

مہاراشٹر کے امراوتی میں کل یعنی 6 فروری کو ہوئے میونسپل کارپوریشن کے میئر کے انتخاب کے دوران اس وقت بڑی سیاسی کھلبلی مچ گئی جب غیر متوقع طور پر اے آئی ایم آئی ایم کارپوریٹر میرا کامبلے نے بی جے پی امیدوار شری چند تیجوانی کے حق میں ووٹ دے دیا۔ یہ واقعہ امراوتی میں ہوا اور اسی اے آئی ایم آئی ایم کی حمایت کی وجہ سے شری چند تیجوانی میئر منتخب ہوگئے۔ عام طور پر بی جے پی کی مخالف سمجھی جانے والی اے آئی ایم آئی ایم کے اس رُخ  سے سیاسی حلقوں میں طوفان مچ گیا ہے۔

امراوتی میونسپل کارپوریشن کے میئر کے انتخاب میں غیر متوقع تبدیلیاں دیکھی گئیں۔ اے آئی ایم آئی ایم کارپوریٹر میرا کامبلے نے آخری وقت میں بی جے پی امیدوار شری چند تیجوانی کی حمایت کرکے سبھی کو حیران کردیا۔ اس حمایت نے بی جے پی کو فیصلہ کن برتری دلائی اور شری چند تیجوانی نے میئرعہدے پر قابض ہوگئے۔

اس واقعہ کے فوراً بعد اے آئی ایم آئی ایم نے سخت موقف اپنایا اور میرا کامبلے کو پارٹی سے برطرف کر دیا۔ اس کے ساتھ ہی پارٹی نے کہا کہ یہ فیصلہ اس کے نظریات اور نظم و ضبط کے خلاف ہے۔ اے آئی ایم آئی ایم نے کمشنر کو خط لکھ کر کامبلے کا کارپوریٹر کا عہدہ منسوخ کرنے کا مطالبہ کیا ہے۔ دریں اثنا میرا کامبلے کا کہنا ہے کہ انہوں نے ترقیاتی ایجنڈے کو ترجیح دی اور بی جے پی امیدوار شری چند تیجوانی کو ووٹ دیا۔ انہوں نے دلیل دی کہ امراوتی شہر کی ترقی کے لیے یہ فیصلہ ضروری تھا۔

میئر کے انتخاب کے ساتھ ہی ڈپٹی میئر کے عہدے کے لیے بھی انتخابات ہوئے جس میں یوا سوابھیمان پارٹی کے سچن بھینڈے ڈپٹی میئر منتخب کئے گئے۔ امراوتی میونسپ کارپوریشن میں مہایوتی کی حکومت ہوگئی ہے۔ اس مہایوتی میں بی جے پی، شیو سینا (شندے گروپ)، نیشنلسٹ کانگریس پارٹی( اجیت پوار گروپ) اور یووا سوابھیمان پارٹی شامل ہیں۔ متفقہ اقتدار شراکت داری فارمولے کے تحت شری چند تیجوانی پہلے 1.5 سال کے لیے میئر کا عہدہ سنبھالیں گے۔ اس کے بعد بی جے پی کے ہی آشیش اتکرے اگلے 1.5 سالوں کے لیے میئر کاعہدہ سنبھالیں گے۔