سازش رچنے میں بی جے پی کو ید طولی حاصل ہے: اکھلیش یادو

لکھنؤ: سماج وادی پارٹی (ایس پی) سربراہ اکھلیش یادو نے بھارتیہ جنتا پارٹی (بی جے پی) پر میٹھی میٹھی باتیں کر کے جھوٹ اور بدنیتی پر مبنی پروپیگنڈہ کرنے کا الزام لگاتے ہوئے کہا کہ سازش رچنے میں بی جے پی کو یدطولی حاصل ہے اس میں کسی کو کوئی شبہ نہیں ہے۔ اکھلیش یادو نے بدھ کو یہاں جاری بیان میں کہا کہ بی جے پی اور آر ایس ایس دونوں کے کردار مشکوک پائے جاتے ہیں۔ ان کے قول و فعل میں زمین آسمان کا فرق پایا جاتا ہے۔ کہنے کو بڑے بڑے وعدے، میٹھی میٹھی باتیں لیکن حقیقت میں جھوٹ کا پلندہ ہوتی ہیں۔

اکھلیش یادو نے کہا کہ وزیر اعلی کو اپوزیشن سے شکایتیں ہی شکایتیں ہیں ہر وقت انہیں اپنی کرسی جانے کا ڈر ستاتا ہے۔ کبھی انہیں کوئی سازش دکھتی ہے تو کبھی اپوزیشن کے پاس ویژن نہ ہونے کی شکایت ہوتی ہے۔ سچائی اس کے بالکل برعکس ہے۔ سازش رچنے میں بی جے پی کو یدطولی حاصل ہے۔ افواہ بازی میں ان کا کوئی جواب نہیں۔ رہی بات ویژن کی تو بی جے پی کا ویژن صاف ہے سماج کو تقسیم کرو اور نفرت پیدا کر کے سماجی ہم آہنگی کو تباہ کرو۔

اکھلیش یادو نے سوالیہ انداز میں کہا کہ وزیر اعلی کو بتانا چاہیے کہ اترپردیش ان کے ساڑھے تین سالہ میعاد کار میں تباہی کے راستے میں کیسے چلا گیا۔ وزیر اعلی نہ تو کسانوں، نہ ہی جوانوں کا بھلا کرسکے ہیں اور نہ ہی بہو بیٹیوں کی عزت بچا پاتے ہیں۔ ہر طرح سے ناکام بی جے پی حکومت ریاستی عوام پر بوجھ بنی ہوئی ہے۔

اکھلیش یادو نے کہا کہ ریاستی حکومت کے جھوٹ کا تازہ نمونہ ہے کہ اچھی کوالٹی کے دھان کی زیادہ سے زیاہ سرکاری ریٹ 1888 روپئے فی کوئنٹل ہے جبکہ کسان 1000 سے لے کر 1300 روپئے فی کوئنٹل دھان فروخت کرنے کو مجبور ہیں۔ کسان کی آمدنی دوگنی کرنے کا یہی طریقہ ہے۔ کسان کو اگلی فصل بونے کے لئے کھاد، بیج، ڈیژل، جرائم کش ادویہ کی ضرورت پر قرض لینا ہی ہوگا اور جب قرض سے ابھرنے کا کوئی طریقہ نہیں دکھتا ہے تو کسان خودکشی کرلیتا ہے۔