بی جے پی کی حالت خستہ، بہتر وزیر اعظم ثابت ہوں گے راہل: پرینکا گاندھی

رائے بریلی: کانگریس جنرل سکریٹری (اترپردیش) پرینکا گاندھی واڈرا نے پیشین گوئی کرتے ہوئے کہا کہ کانگریس کے مضبوط امیدواروں کی بدولت اترپردیش میں بی جے پی کی حالت کافی خستہ ہے۔ اترپردیش میں اس کا مظاہرہ کافی خراب ہوگا۔

رائے بریلی کی بھگولا میں ایک انتخابی میٹنگ میں پرینکا گاندھی نے کہا کہ بی جے پی کو اترپردیش میں بڑا جھٹکا لگے گا وہ عموماً کانگریس کے مضبوط امیدواروں سے بری طرح سے ہارے گی۔ ہمارے امیدوار بی جے پی کو سخت ٹکر دے رہے ہیں۔

پرینکا گاندھی نے مزید کہا کہ جہاں ہمارا امیدوار کمزور ہے وہاں پر بھی وہ بی جے پی کا ہی ووٹ کاٹے گا۔ ہمارا کمزور امیدوار بھی بی جے پی کے ووٹ بینک میں سیندھ لگائے گا اور اس طرح سے وہاں سے اتحاد کے امیدوار کی جیت ہوگی۔ ملحوظ رہے کہ یہ پہلی بار ہے جب پرینکا نے اترپردیش میں پارٹی کی حکمت عملی پر بات کی ہے۔

امیٹھی میں بھائی اور رائے بریلی میں ماں کے لئے انتخابی مہم چلانے والی پرینکا نے بدھ کو بگھولا علاقے میں پارٹی کارکنوں سے ملاقات کی۔ امیٹھی اور رائے بریلی میں پانچویں مرحلے کے تحت 6 مئی کو ووٹ ڈالے جائیں گے۔

’بہتر وزیر اعظم ثابت ہوں گے راہل‘

بدھ کے ہی روز پرینکا گاندھی نے کہا کہ ان کے بھائی اور کانگریس صدر راہل گاندھی بہتر وزیر اعظم ثابت ہوں گے۔ پرینکا گاندھی رائے بریلی کے سلون حلقہ اسمبلی میں آنے والے بگھولا میں ایک کارنر میٹنگ سے خطاب کر رہی تھیں۔

پرینکا گاندھی نے امیٹھی لوک سبھا سیٹ سے راہل گاندھی کے سامنے کھڑی بی جے پی کی امیدوار اسمرتی ایرانی پر گاؤں پردھانوں کو پیسہ بانٹنے کا الزام عائد کیا۔ انہوں نے کہا کہ گاؤں گاؤں جوتے تقسیم کر کے اسمرتی ایرانی عوام کے بے عزتی کر رہی ہیں۔ پرینکا گاندھی نے کہا، ’’وہ کہتے ہیں کہ یہ کنبہ پروری ہے لیکن یہ امیٹھی کے لوگوں کی محبت ہے جو ہمارے خاندان کو ملتی ہے۔‘‘

انہوں نے مزید کہا کہ امیٹھی کے عوام نے ان کے والد کو بھی محبت دی ہے اور اب ان کے بھائی کو بھی جیتا کر محبت کا اظہار کرتے ہیں۔ پرینکا نے کہا، ’’جب میں 12 سال کی تھی تو یہاں تمام زمینیں بنجر تھیں۔ مجھے یاد ہے کہ میرے والد نے آپ کے حق میں اتنی جد و جہد کی کہ یہ پورا علاقہ سر سبز نظر آنے لگا۔

(یو این آئی ان پٹ کے ساتھ)