بی جے پی لیڈروں پر اقتدار کا نشہ حاوی، دو رہنما پولیس افسر کو گالی دینے کے الزام میں گرفتار

بی جے پی لیڈر اور سابق ضلع پنچایت صدر دیپو سنگھ اور ان کے بیٹے کرم ویر کو اوریا ضلع میں ایک پولیس افسر کو گالی دینے کے معاملے میں گرفتار کیا گیا ہے۔ اوریا پولیس سپرنتنڈنٹ ابھشیک ورما کے مطابق پیر کے روز ایک ویڈیو وائرل ہوئی، جس میں دیپو سنگھ اور کئی دیگر لوگ تھانے میں ایک پولیس افسر سنتوش کمار اوستھی کو گالی دیتے نظر آئے۔

دیپو سنگھ نے مبینہ طور پر نسل پرستی پر مبنی الفاظ کا استعمال کر کے کوتوال سنتوش کمار اوستھی کی بے عزتی کی تھی۔ اس وجہ سے برہمن طبقہ کے اراکین نے احتجاجی مظاہرہ کیا تھا۔ ویڈیو کو نوٹس میں لیتے ہوئے ایڈیشنل پولیس سپرنٹنڈنٹ کو معاملے کی جانچ کرنے کے لیے کہا گیا اور ابتدائی جانچ کے بعد دیپو سنگھ اور ان کے بیٹے کرم ویر کے خلاف کئی سنگین دفعات کے تحت معاملہ درج کیا گیا۔

دونوں کو گرفتار کرنے کے بعد جیل بھیج دیا گیا۔ اس درمیان بی جے پی ضلع صدر شری رام مشرا نے کہا کہ اس معاملے سے پارٹی کے ریاستی صدر سوتنتر دیو سنگھ کو مطلع کرا دیا گیا ہے اور اس پر فیصلہ لیا جائے گا۔