ہندو-مسلم کی سیاست کر ووٹ حاصل کرتی ہے بی جے پی: سنجے سنگھ

عام آدمی پارٹی اِن دنوں اترپردیش میں اپنی پارٹی کو مزید مضبوط کرنے کی سمت میں تیزی سے کام کر رہی ہے۔ پارٹی کے سینئر لیڈر اور راجیہ سبھا رکن سنجے سنگھ نے منگل (10 جون) کو پریس کانفرنس کر کئی اہم مسائل پر بات چیت کی۔ انہوں نے بتایا کہ عام آدمی پارٹی لکھنؤ، پریاگ راج، میرٹھ اور فیروز آباد جیسے شہروں میں کارکنان کے ساتھ میٹنگ کرنے جا رہی ہے۔ آج بارہ بنکی میں ایودھیا کی میٹنگ ہو رہی ہے، جس میں کارکنان کے ساتھ پارٹی کی توسیع کی حکمت عملی پر تبادلہ خیال کیا جائے گا۔

سنجے سنگھ نے پریس کانفرنس میں اترپردیش کی یوگی حکومت پر بھی جم کر حملہ بولا ہے۔ انہوں نے کہا کہ یوگی حکومت نے ضلع پنچایت اور بلاک پرمکھ کے انتخابات عوام کے ذریعہ کرانے کی بات کہی تھی۔ اگر ایسا ہوتا ہے تو عام آدمی پارٹی اس کا استقبال کرے گی۔ ساتھ ہی انہوں نے بدایوں کے ضلع اسپتال میں کئی نوزائیدہ بچوں کی موت کا معاملہ اٹھایا۔ سنجے سنگھ کے مطابق اسپتال میں مشینیں تو ہیں لیکن انہیں چلانے والا کوئی نہیں ہے۔ اس لاپرواہی کے لیے انہوں نے یوگی حکومت کو ذمہ دار ٹھہرایا۔ علاوہ ازیں انہوں نے سلطان پور میں بغیر نوٹس کے غریبوں کے گھروں کو منہدم کیے جانے کا معاملہ اٹھاتے ہوئے کہا کہ ’’ہم اس معاملہ کو ہائی کورٹ تک لے جائیں گے اور غریبوں کو انصاف دلائیں گے۔‘‘

سنجے سنگھ نے بی جے پی پر طنز کستے ہوئے کہا کہ ہندو-مسلمان کی سیاست کر کے ووٹ حاصل کرنا الگ بات ہے، لیکن عوام کے لیے کام کرنا دوسری بات ہے۔ بی جے پی حکومت کو عوام کے مسائل پر توجہ مرکوز کرنی چاہیے۔ انہوں نے دہلی میں اسکولوں کی فیس اور بس کرایے میں اضافہ کا ذکر کرتے ہوئے کہا کہ اس کی وجہ سے عام لوگ پریشان ہیں، لیکن دہلی کی ریکھا گپتا حکومت اس پر کوئی توجہ نہیں دے رہی ہے۔ ہماری حکومت نے ہمیشہ عام لوگوں کے مسائل کو اٹھایا، ہم نے سب کے لیے کام کیا۔ ساتھ ہی پارٹی کارکنان کو متحد کرنے اور عوام کے مسائل کو اٹھانے پر زور دیتے ہوئے کہا کہ ’’ہم عوام کی آواز بن کر ان کی لڑائی لڑیں گے اور اترپردیش میں تبدیلی لائیں گے۔‘‘