ضمنی انتخابات: ایم پی میں کانگریس نے پرچم لہرایا، اڈیشہ میں بھی بی جے پی کو شکست

مدھیہ پردیش اور اڈیشہ کے اسمبلی ضمنی انتخابات سے متعلق بی جے پی دعویٰ کیا تھا کہ ان کی فتح یقینی ہے اور اس بار کی ہولی ’فتح کی ہولی‘ ہوگی۔ لیکن تینوں اسمبلی سیٹوں پر بی جے پی کو جو شرمناک شکست حاصل ہوئی ہے وہ 2019 عام انتخابات کے لیےکسی خطرے کی گھنٹی سے کم نہیں ہے۔ دوسری طرف کانگریس نے مدھیہ پردیش کی دونوں اسمبلی سیٹوں پر شاندار کامیابی حاصل کر کے ظاہر کر دیا ہے کہ وہ آئندہ سال ہونے والے انتخابات میں کرشمہ دکھانے کے لیے تیار ہے۔

مدھیہ پردیش کے کولارس اور مونگاؤلی سیٹ پر کانگریس نے فتح کا پرچم لہراتے ہوئے وزیر اعلیٰ شیو راج سنگھ چوہان کے تو ہوش ہی اڑا دیے ہیں۔ ایک طرف کانگریس کے برجیندر سنگھ یادو نے مونگاؤلی سیٹ پر بی جے پی کے صاحب یادو کو 2124 ووٹوں سے ہرایا اور دوسری طرف کولارس سیٹ پر کانگریس امیدوار مہندر سنگھ یادو نے بی جے پی امیدوار دیویندر کمار جین کو 8000 سے زائد ووٹوں سے ہرایا۔

دوسری طرف اڈیشہ میں برسراقتدار بی جے ڈی نے بھی بی جے پی کے ارمانوں پر پانی پھیر دیا۔ بیجے پور اسمبلی سیٹ پر بی جے ڈی نے تقریباً 42 ہزار ووٹوں کے فرق سے بی جے پی کو پٹخنی دی۔ یہاں 21 مراحل میں کاؤنٹنگ ہوئی جس میں ریتا رانی ساہو کو ایک 1 لاکھ 2 ہزار 871 ووٹ ملے جب کہ بی جے پی کے اشوک پنگڑھی کو کل 60 ہزار 938 ووٹ حاصل ہوئے۔