دہلی کے چڑیا خانہ میں برڈ فلو کی دہشت، 12 پرندوں کی موت کے بعد مویشیوں کی سی سی ٹی وی سے ہو رہی نگرانی

دہلی کے چڑیا خانہ میں اس وقت برڈ فلو کی دہشت بری طرح سے پھیل گئی ہے۔ برڈ فلو کے انفیکشن نے خطرے کی گھنٹی بجا دی ہے اور چڑیا خانہ کی انتظامیہ اب پوری طرح الرٹ دکھائی دے رہی ہے۔ گزشتہ کچھ دنوں میں یہاں 12 پرندوں کی موت ہو چکی ہے، جس کے بعد انتظامیہ نے نگرانی اور مویشیوں کی حفاظت کی ترکیبیں مضبوط کر دی ہیں۔ افسران کا کہنا ہے کہ ایچ 5 این 1 ایوین انفلوئنزا وائرس کی تصدیق ہونے کے بعد پورے احاطہ کو سینیٹائز کیا جا رہا ہے اور حفاظتی پروٹوکول کو سختی سے نافذ کیا گیا ہے۔

ایک افسر نے میڈیا سے بات کرتے ہوئے بتایا کہ نگرانی ٹیم دن میں دو مرتبہ پورے چڑیا خانہ کا جائزہ لے رہی ہے۔ مہاجر پرندوں کے باڑوں، تالابوں اور چراگاہوں کی خصوصی صفائی کر انھیں جراثیم سے پاک کیا جا رہا ہے۔ ساتھ ہی سی سی ٹی وی کیمروں اور محافظوں کی مدد سے سبھی مویشیوں کی سحت اور ان کے سلوک پر قریبی نظر رکھی جا رہی ہے۔ چڑیا خانہ انتظامیہ نے ملازمین دستانے، ماسک، حفاظتی لباس وغیرہ دستیاب کرائے ہیں تاکہ انفیکشن پھیلنے کا خطرہ کم سے کم رہے۔ متاثرہ پرندوں کو الگ کر دیا گیا ہے اور ان کی لگاتار نگرانی کی جا رہی ہے۔

موصولہ اطلاع کے مطابق گزشتہ اتوار (31 اگست) تک 6 پینٹیڈ اسٹارک اور 2 سیاہ گردن والے آئبس پرندوں کی موت ’ایکویٹک ایویئری‘ (آبی پرندہ خانہ) میں ہو چکی ہے، جبکہ 4 مہاجر پینٹیڈ اسٹارک تالابوں میں مردہ پائے گئے۔ جانچ میں پایا گیا کہ 2 پینٹیڈ اسٹارک اور 2 آئبس پرندوں کے نمونوں میں ایچ 5 این 1 وائرس موجود ہے۔ برڈ فلو کی تصدیق کے بعد چڑیا خانہ انتظامیہ نے حفاظت کے مدنظر احاطہ کو عارضی طور سے عوام کے لیے بند کر دیا ہے۔ افسران کا کہنا ہے کہ انفیکشن کو کنٹرول کرنے کے لیے سبھی ضروری قدم اٹھائے جا رہے ہیں اور حالات پر لگاتار نظر رکھی جا رہی ہے۔