بہار میں اسمبلی انتخابات سے قبل تیج پرتاپ کا نئی پارٹی کا اعلان، ہمہ جہت ترقی کا وعدہ

پٹنہ: بہار میں آر جے ڈی (راشٹریہ جنتا دل) کے صدر لالو پرساد یادو کے بڑے بیٹے اور سابق وزیر تیج پرتاپ یادو نے اپنی نئی سیاسی پارٹی کے قیام کا اعلان کر دیا، جس کا نام انہوں نے ’جن شکتی جنتا دل‘ رکھا ہے اور دعویٰ کیا ہے کہ انہیں الیکشن کمیشن کی جانب سے انتخابی نشان ’بلیک بورڈ‘ الاٹ کیا گیا ہے۔

تیج پرتاپ نے جمعہ کو سوشل میڈیا پلیٹ فارم ’ایکس‘ پر پارٹی کا پوسٹر جاری کیا۔ اس پوسٹر میں انہوں نے خود کو ’قومی صدر‘ کے طور پر پیش کیا ہے جبکہ انتخابی نشان کے طور پر ’بلیک بورڈ‘ کو نمایاں کیا گیا۔

تیج پرتاپ نے اپنے بیان میں کہا کہ ان کی پارٹی بہار کے ہمہ جہت ترقی کے لیے پوری طرح وقف ہے اور وہ ریاست میں ایک نئی سیاسی و سماجی تبدیلی کے لیے جدوجہد کریں گے۔ ان کے مطابق، ’’ہمارا مقصد بہار میں مکمل بدلاؤ لا کر نئی طرز حکمرانی قائم کرنا ہے۔ ہم ریاست کے عوام کے مسائل حل کرنے کے لیے طویل جدوجہد کے لیے تیار ہیں۔‘‘

دریں اثنا، الیکشن کمیشن کے ذرائع نے میڈیا کو بتایا کہ انہیں اس نام کی کسی پارٹی کی رجسٹریشن یا اس کے لیے انتخابی نشان الاٹ کیے جانے کی کوئی اطلاع نہیں ملی ہے۔ کمیشن کے مطابق اب تک اس نام سے کسی سیاسی جماعت کو باضابطہ منظوری نہیں دی گئی ہے۔ اس تضاد کے باعث سیاسی حلقوں میں بحث چھڑ گئی ہے کہ آیا واقعی تیج پرتاپ کی نئی پارٹی کو قانونی منظوری ملی ہے یا یہ صرف ابتدائی اعلان ہے۔

یاد رہے کہ تیج پرتاپ نے گزشتہ ماہ دعویٰ کیا تھا کہ ان کی قیادت میں بہار کی پانچ چھوٹی جماعتوں کا اتحاد قائم ہو چکا ہے اور وہ آنے والے انتخابات میں مشترکہ پلیٹ فارم سے میدان میں اتریں گے۔ اس اعلان کے بعد سیاسی مبصرین نے قیاس آرائیاں شروع کر دی تھیں کہ تیج پرتاپ جلد ہی نئی پارٹی کی بنیاد رکھ سکتے ہیں۔

قابل ذکر ہے کہ تیج پرتاپ یادو کو حال ہی میں ایک سوشل میڈیا پوسٹ کے تنازعہ کے بعد آر جے ڈی سے نکال دیا گیا تھا۔ اس کے بعد سے وہ ریاست کے مختلف علاقوں کا دورہ کر رہے ہیں اور اپنی نئی سیاسی شناخت قائم کرنے کی کوشش میں مصروف ہیں۔ تیج پرتاپ کا انتخابی حلقہ مہوا رہا ہے اور امکان ہے کہ وہ آنے والے اسمبلی انتخابات میں دوبارہ اسی نشست سے قسمت آزمائیں گے۔