بہار میں آسمانی بجلی کا قہر، 17 لوگوں کی موت، کئی زخمی

بہار کے کئی اضلاع میں گزشتہ 24 گھنٹوں میں بارش کے دوران آسمانی بجلی گرنے سے کم از کم 17 افراد کی موت ہو گئی۔ اس حادثہ میں کئی لوگ سنگین طور پر زخمی بھی ہو گئے ہیں۔ بہار ریاستی آفات مینجمنٹ محکمہ کے ایک افسر نے بدھ کو بتایا کہ منگل کو دوپہر کے بعد ریاست کے زیادہ تر علاقوں میں تیز ہوا کے ساتھ جھماجھم بارش ہوئی۔ اس درمیان کئی علاقوں میں آسمانی بجلی گرنے سے کم از کم 17 لوگوں کی موت ہو گئی ہے۔ ڈپارٹمنٹ کا کہنا ہے کہ ان اعداد و شمار میں مزید اضافہ ہونے کا امکان ہے۔

محکمہ کے چیف سکریٹری پرتیہ امرت نے بتایا کہ اب تک یہاں پہنچی خبر کے مطابق کیمور اور گیا ضلع کے مختلف علاقوں میں آسمانی بجلی گرنے سے تین تین لوگوں کی موت ہو گئی ہے، جب کہ مشرقی چمپارن، سیوان، بھوجپور، ارول اور پٹنہ میں دو-دو اور کٹیہار میں ایک شخص کو آسمانی بجلی کی زد میں آنے سے جان گنوانی پڑی۔ مہلوکین کے اہل خانہ کو 4-4 لاکھ روپے معاوضہ دینے کا اعلان کیا گیا ہے۔

اِدھر راجدھانی پٹنہ میں منگل کی رات پولس لائن میں ایک بڑا درخت گر جانے سے 9 پولس اہلکار بری طرح سے زخمی ہو گئے ہیں۔ واقعہ کے بعد پولس لائن میں افرا تفری مچ گئی ہے۔ آناً فاناً میں زخمیوں کو پٹنہ میڈیکل کالج اسپتال (پی ایم سی ایچ) میں داخل کرایا گیا۔ زخمیوں میں سے دو کی حالت سنگین بتائی جا رہی ہے۔ پولس ڈائریکٹر جنرل گپتیشور پانڈے نے پولس لائن پہنچ کر حالات کا جائزہ لیا اور زخمی جوانوں کا حال چال لے رہے ہیں۔