نتیش کمار کے صدر امیدوار بننے کا تذکرہ پھر شروع، آر جے ڈی نے پیش کی نیک خواہشات

ہندوستان کے اگلے صدر کے انتخاب سے متعلق تاریخ کا اعلان ہو چکا ہے، اور ساتھ ہی بہار میں ایک بار پھر سیاسی ہلچل بڑھ گئی ہے۔ بہار حکومت میں وزیر اور جنتا دل یو کے سینئر لیڈر شرون کمار کے نتیش کمار کو صدر امیدوار بنائے جانے کی بات کہنے سے ایک بار پھر اس سلسلے میں بحث شروع ہو گئی ہے۔ اس درمیان آر جے ڈی نے بھی نتیش کمار کے صدر امیدوار بننے کو لے کر نیک خواہشات پیش کر دی ہے۔

آر جے ڈی کے ترجمان مرتیونجے تیواری نے کہا کہ نتیش کمار سینئر لیڈر ہیں اور تجربہ کار بھی ہیں۔ اگر بہار کا کوئی بھی شخص صدر جمہوریہ بنتا ہے تو بہار کے لوگوں کو خوشی ہوگی۔ حالانکہ انھوں نے نتیش کمار کو نیک خواہشات پیش کرتے ہوئے کہا کہ کوئی بھی کارکن اپنے لیڈر کو وزیر اعظم اور صدر بنتے دیکھنا چاہتا ہے، لیکن سب سے بڑا سوال ہے کہ نتیش کمار صدر بنیں گے کیسے۔

دراصل بہار کی نتیش حکومت میں وزیر شرون کمار نے جمعرات کو اپنے ایک بیان میں کہا تھا کہ وزیر اعلیٰ نتیش کمار میں صدر جمہوریہ اور وزیر اعظم بننے کی پوری قابلیت ہے۔ انھوں نے ساتھ ہی یہ بھی کہا تھا کہ وزیر اعلیٰ نتیش کمار کا ویژن اور نظریہ قومی-بین الاقوامی سطح کا ہے۔ اگر نتیش کمار صدر بنتے ہیں تو ہر بہاری کو اس میں خوشی ہوگی۔

اس معاملے پر جب بی جے پی سے سوال کیا گیا تو بہار کے وزیر زراعت امریندر پرتاپ سنگھ نے کہا کہ نتیش کمار تجربہ کار لیڈر ہیں، اور ماہر بھی ہیں، اس سے کوئی انکار نہیں کر سکتا۔ حالانکہ انھوں نے یہ بھی کہہ دیا کہ ہندوستان میں صلاحیتوں کی کمی نہیں ہے۔ لاکھوں لوگ ہیں جن میں صلاحیت ہے۔ امریندر پرتاپ کا کہنا ہے کہ صدر کو لے کر اجتماعی فیصلے کی بات ہے، صدر عہدہ کے لیے امیدوار این ڈی اے کو طے کرنا ہے۔