اکھلیش یادو نے کھیساری لال کے لیے مانگے ووٹ، کہا- ’بی جے پی کے ایجنڈے میں روزگار نہیں، بہار سے ہجرت جاری‘
اکھلیش یادو نے کہا کہ ’’بی جے پی کبھی بھی لوگوں کی زندگی کو بہتر بنانے کی بات نہیں کرتی ہے۔ روزگار کبھی بھی بی جے پی کا ایجنڈا نہیں رہا ہے، یہی وجہ ہے کہ بہار سے آج بھی ہجرت کا دور جاری ہے‘‘
بہار اسمبلی انتخاب میں اس بار سارن ضلع کے چھپرا حلقہ اسمبلی سیٹ سے بھوجپوری اداکار کھیساری لال یادو راشٹریہ جنتادل کی جانب سے میدان میں اترے ہوئے ہیں۔ اتوار کو سماجوادی پارٹی کے قومی صدر اور اترپردیش کے سابق وزیر اعلیٰ اکھلیش یادو نے کھیساری لال کی حمایت میں ریلی کو خطاب کیا۔ اس دوران انہوں نے بی جے پی کو ہدف تنقید بنایا تھا، ساتھ ہی این ڈی اے کی ترقی اور روزگار ماڈل پر بھی جم کر حملہ بولا۔
اکھلیش یادو نے کہا کہ بی جے پی کبھی بھی لوگوں کی زندگی کو بہتر بنانے کی بات نہیں کرتی ہے۔ روزگار کبھی بھی بی جے پی کا ایجنڈا نہیں رہا ہے، یہی وجہ ہے کہ بہار سے آج بھی ہجرت کا دور جاری ہے۔ بہار کے نوجوان روزگار کے لیے دوسری ریاستوں کا رخ کر رہے ہیں۔ این ڈی اے حکومت یہاں کے نوجوانوں کو روزگار فراہم کرانے میں مکمل طور سے ناکام رہی ہے۔ ساتھ ہی انہوں نے پرامید انداز میں کہا کہ آخر ہر گھر میں سرکاری نوکری کیوں نہیں دی جا سکتی؟
اکھلیش یادو نے جلسۂ عام سے خطاب کرتے ہوئے کہا کہ یہ بھیڑ بتا رہی ہے کہ چھپرہ سے کھساری لال یادو کی بڑی جیت ہوگی۔ اس بار ووٹ چھپر پھاڑ کر پڑے گا اور کھساری بھائی کی جیت یقینی ہے۔ ساتھ ہی انہوں نے ریلی میں آئے لوگوں سے کہا کہ جب کھساری جیتیں گے تو ہم سب مل کر جیت کا گانا گائیں گے۔ اکھلیش یادو نے اس دوران این ڈی اے حکومت کو بھی ہدف تنقید بنایا۔ ان کا کہنا ہے کہ چھپرہ کی ترقی رکی ہوئی ہے، این ڈی اے حکومت کی ترقی کے دعوے چھپرہ میں کھوکھلے ثابت ہو رہے ہیں۔ اس بار مہاگٹھ بندھن کی حکومت بنانے کے بعد پورے بہار کی ترقی کی ہوگی۔
آر جے ڈی امیدوار کھساری لال یادو نے بھی اسٹیج سے بی جے پی پر جم کر حملہ بولا۔ انہوں نے کہا کہ این ڈی اے کے لوگ کبھی بھی روزگار کی بات نہیں کرتے، کبھی بھی بہار کے نوجوانوں کی زندگی کو بہتر کرنے کی بات نہیں کرتے ہیں۔ این ڈی اے کے لوگ ہمیشہ ہندوتوا، مندر-مسجد اور پاکستان پر بحث کرتے ہیں۔ آر جے ڈی امیدوار کھساری لال یادو نے کہا کہ گزشتہ 20 سالوں میں بہار میں ایک بھی فیکٹری نہیں لگی، یہاں کے لوگوں کو مجبوری میں اپنے گھر سے باہر ہجرت کرنا پڑتا ہے۔ ٹرین تو مل جاتی ہے باہر جانے کے لیے، لیکن بہار میں روزگار نہیں ہے۔ ساتھ ہی انہوں نے کہا کہ اس بار بہار میں بدلاؤ کی لہر چل رہی ہے اور تبدیلی ہوکر رہے گی۔
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔