اتر پردیش: حمیرپور میں شادی تقریب کے دوران بڑا حادثہ، ایل پی جی سلنڈر میں آگ لگنے سے 22 جھلسے، 8 کی حالت سنگین

اتر پردیش کے حمیر پور ضلع کے راٹھ قصبہ میں بدھ کی دیر شب ایک شادی تقریب کے دوران ایل پی جی سلنڈر لیک ہونے سے آگ لگ گئی۔ اس سے وہاں آس پاس موجود 22 افراد جھلس گئے۔ اس معاملے میں پولیس نے کہا کہ سنگین طور پر جھلسے لوگوں کو جالون ضلع کے ارئی میڈیکل کالج میں داخل کرایا گیا ہے۔

موصولہ اطلاعات کے مطابق باورچی کے ذریعہ جلائے گئے گیس اسٹور سے آگ لگ گئی، جو پاس موجود لکڑی کے ڈھانچے میں پھیل گئی۔ واقعہ کی اطلاع ملنے پر موقع پر پہنچی دمکل کی ٹیم نے سخت مشقت کے بعد آگ پر قابو پایا۔ اس واقعہ کے تعلق سے دیوان پورہ محلہ کے باشندہ باورچی مہیپت نے بتایا کہ اپنی ٹیم کے ساتھ وہ کھانا پکا رہے تھے۔ گیس سلنڈر ختم ہونے پر دوسرا بدل کر لگایا۔ جیسے ہی بھٹی میں آگ لگائی، اچانک لیکج سلنڈر نے آگ پکڑ لی۔