بنگال کی ’جھال موڑی‘ کا انٹر نیٹ پر آیا طوفان، 22 برسوں میں سب سے زیادہ سرچ کئے جانے کا بنایا ریکارڈ

ہندوستان اپنے کھانوں اور رہن سہن کے لیے کافی مشہور ہے۔ یہاں ہر علاقہ اپنے کسی نہ کسی کھانے کے نام سے جانا جاتا ہے۔ کچھ اسی طرح بنگال کی ’جھال موڑی‘ ہے جو اس وقت انٹرنیٹ پر دھمال مچائے ہوئے ہے۔ بنگال کا ایک عام اسٹریٹ فوڈ اچانک پورے ملک میں سرخیوں میں آ گیا ہے۔ ایسا کم ہی دیکھنے کو ملتا ہے لیکن اس بار’جھال موڑی‘ نے حقیقت میں انٹرنیٹ پر تہلکہ مچا دیا ہے۔ جھاڑگرام میں انتخابی مہم کے دوران وزیر اعظم کے ایک قلیل قیام کے بعد ایسا دیکھنے میں آیا ہے کہ سوشل میڈیا سے لے کر سب سے بڑے سرچ انجن گوگل تک ہر جگہ بس اسی کھانے کی بات ہو رہی ہے۔ لوگ نہ صرف ویڈیو دیکھ رہے ہیں بلکہ بڑی تعداد میں یہ بھی سرچ کر رہے ہیں کہ آخر جھال موڑی کیا ہے، کیسے بنتی ہے اور کہاں ملتی ہے؟

دراصل وزیر اعظم مودی کے جھال موڑی کھانے والی ویڈیو تیزی سے وائرل ہو رہی ہے۔ اس ویڈیو کے بعد سے ہی گوگل پر ’جھال موڑی‘ کی تلاش میں زبردست اضافہ دیکھنے کو ملا ہے۔ رپورٹس کے مطابق یہ لفظ گزشتہ تقریباً 22 برسوں میں سب سے زیادہ سرچ کیا گیا ہے جو اپنے آپ میں ریکارڈ مانا جا رہا ہے۔ ویڈیو کے وائرل ہونے کے بعد لوگوں کی دلچسپی اتنی بڑھ گئی ہے کہ لاکھوں صارفین نے اس اسٹریٹ فوڈ کے بارے میں معلومات حاصل کرنا شروع کر دیا ہے۔ سوشل میڈیا اسے بھی ’مودی افیکٹ‘ بتانے میں مصروف ہے اور ردعمل کا اظہار کرتے ہوئے صارفین کہہ رہے ہیں کہ ’’ایک معمولی اسٹال کی قسمت راتوں رات بدل گئی۔‘‘

بتا دیں کہ انتخابی ریاست بنگال کے جھاڑگرام میں انتخابی مہم کے دوران پی ایم مودی نے سڑک پر لگی ایک دکان سے جھال موڑی کا لطف اٹھایا تھا اور اس کی ویڈیو خود وزیر اعظم نے اپنے سوشل میڈیا اکاؤنٹ سے شیئر کی تھی۔ اس ویڈیو کو اب تک تقریباً 10 کروڑ سے زیادہ لوگ دیکھ چکے ہیں جس کے بعد اب گوگل پر بھی جھال موڑی کو زبردست شہرت ملی ہے۔