سودے بازی کرنا کانگریس کی ثقافت اور روایت نہیں: کمل ناتھ

دیواس: مدھیہ پردیش کانگریس صدر کمل ناتھ نے آج ریاست کی برسراقتدار بھارتیہ جنتاپارٹی (بی جے پی) پر سودے بازی کرکے ایک منتخب حکومت کو گرانے کا الزام لگاتے ہوئے کہا کہ سودے بازی کرنا کانگریس کی ثقافت اور نظریہ نہیں ہے۔

کمل ناتھ نے ضلع کے ہاٹ پیپلیا میں ایک عوامی جلسہ سے خطاب کرتے ہوئے کہا کہ انہوں نے ریاست کو آگے لے جانے کا کام کیا، کسانوں کے قرض معاف، بے روزگاروں کو روزگار دینے جیسے کئی کام کیے، لیکن بی جے پی نے ایک منتخب حکومت کو سودے بازی کرکے گرا دیا۔ انہوں نے کہا کہ سودے بازی کرنا کانگریس کی ثقافت اور روایت نہیں ہے۔ اگر کانگریس بھی سودے بازی کرتی تو، آج ریاست میں یہ ضمنی انتخاب نہ ہوتے۔

کمل ناتھ نے کہا کہ ہم نے زراعت کے شعبے میں انقلاب لانے کا آغاز کیا، کیونکہ کسانوں کی پیدائش بھی قرض میں ہوتی ہے اور ان کی موت بھی۔ انہوں نے کہا کہ ہم نے نہ صرف ڈیفالٹر کسانوں کا قرض معاف کیا، بلکہ کرنٹ کھاتوں والے کسانوں کا بھی قرض معاف کیا۔

کمل ناتھ کہا کہ انہیں 15 مہینے میں 11 مہینے کام کرنے کا موقع ملا، جس کا وہ حساب دینے کے لئے تیار ہیں، لیکن پہلے بی جے پی کو اپنے 15 برسوں کا حساب دینا چاہیے۔ اس موقع پر اجلاس سے علاقے کے انچارج اور سابق وزریر سجن سنگھ ورما، سابق وزیر جیتو پٹواری، راجندر سنگھ بگھیل، کونال چودھری، ضلع صدر اشوک پٹیل وغیرہ نے بھی خطاب کیا۔