رامپور میں اعظم خان کا رسوخ برقرار، اہلیہ تزئین فاطمہ فتحیاب

ایس پی کی ڈاکٹر تزئین فاطمہ نے بھارتیہ جنتا پارٹی (بی جے پی) کے بھارت بھوشن کو نزدیکی مقابلے میں 7716 ووٹوں سے شکست دے کر رامپور حلقے میں اعظم خان نے اپنی فیملی کے رسوخ کو برقرار رکھا

تصویر سوشل میڈیا
تصویر سوشل میڈیا
user

قومی آوازبیورو

لکھنؤ: وقار کی جنگ میں سماج وادی پارٹی (ایس پی) اتر پردیش کی رامپور اسمبلی سیٹ بچانے میں کامیاب رہی۔ یہاں ایس پی کی ڈاکٹر تزئین فاطمہ نے بھارتیہ جنتا پارٹی (بی جے پی) کے بھارت بھوشن کو نزدیکی مقابلے میں 7716 ووٹوں سے شکست دے کر حلقے میں اپنے رسوخ کو برقرار رکھا ہے۔

رامپور میں مقابلہ تزئین فاطمہ بنام بھارت بھوشن سے زیادہ اعظم خان بنام بی جے پی مانا جا رہا تھا کیوں کہ جب سے اتر پردیش میں بی جے پی حکومت اقتدار میں آئی ہے تبھی سے ان پر یوگی حکومت اور رامپور انتظامیہ کی جانب سے کوئی نہ کوئی کارروائی کی جا رہی ہے اور ان کے خلاف 80 سے زیادہ ایف آئی آر درج کی جا چکی ہیں۔ ان پر بکری چوری، کتاب چوری، چھیڑ خانی، مار پیٹ سے لے کر مرغی چوری تک کے الزامات عائد کیے گئے ہیں۔ اعظم خان نے ضمنی انتخاب میں اپنی اہلیہ کے لئے مہم جوئی کے دوران کہا تھا کہ وہ خود کو فروخت نہیں کر سکے اس لئے ان پر مقدمات درج کیے جا رہے ہیں۔

ڈاکٹر تزئین فاطمہ کو 79 ہزار 43 ووٹ ملے جبکہ بی جے پی امیدوار کو 71327 ووٹوں کے ساتھ دوسرے نمبر پر ہی اکتفاء کرنا پڑا۔ ابتدائی رجحانات میں ایس پی امیدوار نے اچھے ووٹوں سے سبقت حاصل کر لی تھی حالانکہ 18 ویں مرحلے کے بعد بی جے پی امیدوار کے ووٹوں کے گراف میں اضافہ ہوا اور آخری مراحل میں سانس روکنے دینے والے مقابلے میں سماجوادی پارٹی کی جیت ہوئی۔

واضح رہے کہ رام پور ایس پی کی روایتی سیٹ رہی ہے جہاں سے پارٹی کے قدآور لیڈر محمد اعظم خان آٹھ بار رکن اسمبلی رہ چکے ہیں۔ اعظم خان کے رکن پارلیمنٹ منتخب ہونے کے بعد یہ سیٹ خالی ہوئی تھی۔ ایس پی کے لئے وقار کا مسئلہ بنی اس سیٹ پر پارٹی سربراہ اکھلیش یادو نے بھی انتخابی مہم چلائی تھی۔

ایس پی امیدوار کو یہاں 49.13 فیصد ووٹ ملے جبکہ بی جے پی امیدوار کے حصے میں 44.34 ووٹ آئے۔ اس سیٹ پر کانگریس اور بہوجن سماج پارٹی (بی ایس پی) سمیت دیگر امیدواروں کے ضمانت ضبط ہوگئی۔ اس سیٹ پر 44 فیصدی ووٹنگ ہوئی تھی۔

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔


Published: 24 Oct 2019, 6:11 PM