رمضان المبارک کا آخری عشرہ شروع ہوتے ہی ہندوستان میں لاکھوں مسلمان بنے معتکف!

رمضان المبارک کا آخری عشرہ شروع ہو چکا ہے اور ہندوستان کے ساتھ ساتھ پوری دنیا کے مساجد میں ایک گوشہ ان لوگوں کے لیے مخصوص کر دیا گیا ہے جب عید کا چند نکلنے تک ’اعتکاف‘ میں بیٹھے ہوں گے۔ ہندوستان میں لاکھوں شہری ’شب قدر‘ کی تلاش کے لیے سنت اعتکاف کی نیت کے ساتھ مساجد میں گوشہ نشین ہو چکے ہیں اور اب دن رات ان کا مقصد اللہ کی عبادت میں مشغول رہنا ہوگا۔

قابل ذکر ہے کہ اعتکاف عربی زبان کا لفظ ہے جس کے معنی ’ٹھہر جانے‘ اور ’خود کو روک لینے کے‘ ہیں۔ اعتکاف کے لیے لوگ 20ویں رمضان سے عصر کے وقت مساجد میں داخل ہوئے اور اب عیدالفطر کا چاند نظر آنے پر ہی یہ اعتکاف ختم ہوگا۔ ملک کی ہر بڑی اور چھوٹی مسجد میں اب معتکف دکھائی دے رہے ہیں جو نماز اور قرآن کی تلاوت میں مصروف ہیں۔

مسجد الحرام اور مسجد نبویؐ میں تو ایک روز قبل ہی اعتکاف کا آغاز ہو گیا تھا، کیونکہ ہندوستان کے مقابلے وہاں رمضان بھی ایک دن قبل شروع ہوتا ہے اور عید بھی ایک روز قبل ہی منائی جاتی ہے۔ موصولہ اطلاع کے مطابق حرم شریف اور مسجد نبویؐ میں ہزاروں مسلمان اعتکاف میں بیٹھے ہوئے ہیں۔ حرمین انتظامیہ نے اعتکاف کے لیے پورٹل کے ذریعے ہزاروں پرمٹ جاری کیے ہیں۔ معتکفین کے لیے خصوصی دروازے بھی مقرر کیے گئے ہیں اور انھیں تمام سہولیات فراہم کی گئی ہیں۔

بتایا جاتا ہے کہ وہاں معتکفین کو آبِ زم زم کی فراہمی کے ساتھ تلاوت کے لیے قرآن کریم کے نسخے بڑی تعداد میں رکھے گئے ہیں۔ اتنا ہی نہیں، لاکھوں عمرہ زائرین مسجد الحرام اور مسجد نبویؐ میں قیام اللیل میں بھی شریک ہوں گے اور اس سلسلے میں بھی بہت عمدہ انتظام کیا گیا ہے۔ ایک رپورٹ کے مطابق رمضان المبارک کے آخری عشرے میں عمرے کی سعادت حاصل کرنے کے لیے 50 لاکھ سے زائد زائرین سعودی عرب پہنچ چکے ہیں۔