پورا مبینہ شراب گھوٹالہ فرضی ہے، کیجریوال نے9 گھنٹے کی پوچھ گچھ کے بعد دیا یہ بیان

دہلی کے وزیر اعلی اروند کیجریوال  کل صبح 11.10 بجے سی بی آئی ہیڈکوارٹر پہنچے۔ جہاں انہیں سی بی آئی کی اینٹی کرپشن برانچ کی پہلی منزل پر واقع دفتر لے جایا گیا اور ان سے  شراب پالیسی معاملے میں نو گھنٹے کی پوچھ گچھ کی  جس کے بعد  وزیر اعلی تقریباً 8.30 بجے سی بی آئی کے دفتر سے باہر آئے ۔

دہلی کے وزیر اعلی اروند کیجریوال  کل یعنی 16 اپریل کو ایکسائز پالیسی معاملے میں پوچھ گچھ کے لیے سی بی آئی کے سامنے پیش ہوئے۔ وزیر اعلی کیجریوال اپنی گاڑی میں سی بی آئی ہیڈکوارٹر پہنچے۔ جہاں دہلی پولیس نے عام آدمی پارٹی کے رہنماؤں اور کارکنوں کے کسی بھی ممکنہ مظاہرے سے بچنے کے لیے سخت حفاظتی انتظامات کیے تھے۔

وزیراعلیٰ نے سی بی آئی ہیڈ کواٹر سے باہر آنے کے بعد کہا کہ انہوں نے ان سے پوچھے گئے تمام سوالات کے جوابات دیئے۔ انہوں نے کہا کہ ہمارے پاس چھپانے کے لیے کچھ نہیں ہے۔ یہ پورا مبینہ شراب گھوٹالہ جھوٹ، فرضی اور گندی سیاست سے متاثر ہے۔ عآ پ  ایک کٹر ایماندار جماعت ہیں۔انہوں نے کہا کہ ’ ہم مر جائیں گے لیکن اپنی سالمیت سے کبھی سمجھوتہ نہیں کریں گے‘۔

اس سے قبل انکوائری کے پیش نظر سی بی آئی ہیڈکوارٹر کے باہر سخت حفاظتی انتظامات کیے گئے تھے۔ حکام نے بتایا کہ سی بی آئی ہیڈکوارٹر کے باہر نیم فوجی دستوں سمیت 1,000 سے زیادہ سیکورٹی اہلکار تعینات کیے گئے تھے اور اس علاقے میں ضابطہ فوجداری (سی آر پی سی) کی دفعہ 144 نافذ کی گئی تھی۔ پیش ہونے سے پہلے اروند کیجریوال نے الزام لگایا کہ بی جے پی نے تفتیشی ایجنسی کو انہیں گرفتار کرنے کا حکم دیا ہے۔ انہوں نے کہا کہ وہ (بی جے پی) بہت طاقتور ہیں اور کسی کو بھی جیل بھیج سکتے ہیں۔

ٹویٹر پر جاری پانچ منٹ کے ویڈیو پیغام میں کیجریوال نے کہا کہ وہ ایکسائز معاملے میں سی بی آئی کے سوالات کا سچائی اور ایمانداری سے جواب دیں گے کیونکہ ان کے پاس چھپانے کے لیے کچھ نہیں ہے۔ انہوں نے کہا کہ انہیں آج سی بی آئی نے طلب کیا ہے اور وہ  ایمانداری سے تمام  سوالوں کے جواب دوں گا۔ یہ لوگ بہت طاقتور ہیں۔ وہ کسی کو بھی جیل بھیج سکتے ہیں، چاہے اس شخص نے جرم کیا ہو یا نہ کیا ہو۔

واضح رہے پنجاب کے وزیر اعلی بھگونت مان اور راگھو چڈھا، سنجے سنگھ سمیت عآپ  کے کئی رہنما کیجریوال کے ساتھ ایجنسی کے دفتر گئے۔سی بی آئی ہیڈ کواٹر جانے سے پہلے کیجریوال نے  راج گھاٹ پر مہاتما گاندھی کو خراج عقیدت پیش کیا۔

دہلی کے عآپ  کنوینر گوپال رائے نے پارٹی دفتر میں ایک ہنگامی میٹنگ بلائی جس میں عآپ کے قومی سکریٹری پنکج گپتا، دہلی کی میئر شیلی اوبرائے اور ڈپٹی میئر عالے  محمد اقبال بھی میٹنگ میں موجود تھے۔ گوپال رائے نے کہا کہ ساری سازش  کیجریوال کو  گرفتار کرنے کی ہو رہی ہے۔ مرکزی حکومت اور وزیر اعظم جس طرح سے آمرانہ رویہ اختیار کر رہے ہیں اور جس طرح سی بی آئی نے اروند کیجریوال کو بلایا ہے اس سے ظاہر ہو رہا ہے کہ وہ کسی بھی قیمت پر اروند کیجریوال اور عام آدمی پارٹی کو توڑنا چاہتے ہیں۔ ہر ظلم کی ایک انتہا ہوتی ہے اور یہ بھی ہو گی۔