تمل ناڈو میں میڈیا ملازمین کے لئے 5000 روپے کی خصوصی مراعات کا اعلان
ایم کے اسٹالن نے سرکاری حکمنامہ جاری کرکے کورونا وائرس سے مرنے والے میڈیا ملازمین کے اہل خانہ کو دی جانے والی امداد کو 5 لاکھ روپے سے بڑھا کر 10 لاکھ روپے کر دیا ہے۔
چنئی: تمل ناڈو کے وزیر اعلی ایم کے اسٹالن نے میڈیا کے نمائندوں کو کووڈ-19 کے خلاف فرنٹ لائن واریئر قرار دینے کے بعد بدھ کے روز ریاست کے تمام منظور شدہ میڈیا اہلکاروں کے لئے 5000 روپے کی خصوصی مراعات کا اعلان کیا۔
ایم کے اسٹالن نے یہاں ایک بیان میں کہا کہ اے ڈی ایم کے کی سابقہ حکومت نے میڈیا اہلکاروں کو خصوصی امداد کے طور پر 3000 روپے ادا کیے تھے۔ اب اسے بڑھا کر 5000 روپے کر دیا گیا ہے۔ انہوں نے یہ بھی اعلان کیا کہ سرکاری حکمنامہ جاری کرکے کورونا وائرس سے مرنے والے میڈیا ملازمین کے اہل خانہ کو دی جانے والی امداد کو 5 لاکھ روپے سے بڑھا کر 10 لاکھ روپے کر دیا گیا ہے۔
اس کا اطلاق ٹی وی چینلوں میں کام کرنے والے صحافیوں، فوٹو گرافروں اور کیمرہ پرسن سمیت ان تمام اہلکاروں پر ہوگا، جن کو حکومت کی طرف سے کسی بھی طرح کی منظوری، ضلع مجسٹریٹ کی طرف سے جاری کردہ شناختی کارڈ یا مفت بس پاس ملا ہوا ہے۔
ایم کے اسٹالن نے کہا کہ میڈیا حکومت اور عوام کے مابین ایک پُل کے طور پر کام کرتا ہے۔ انہوں نے اس عالمی وبا میں اپنے فرائض سرانجام دینے والے تمام میڈیا اہلکاروں سے احتیاطی تدابیر اختیار کرنے کی اپیل کی ہے۔
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔