’کیا میں بندھوا مزدور ہوں؟‘ ممتا بنرجی نے پی ایم مودی کو بنایا تنقید کا نشانہ

مغربی بنگال کی وزیر اعلیٰ ممتا بنرجی کو وزیر اعظم نریندر مودی نے نیتاجی سبھاش چندر بوس کے مجسمہ کی رسم رونمائی میں مدعو کیا ہے۔ لیکن جس انداز میں انھیں دعوت نامہ بھیجا گیا ہے، اس سے ممتا بنرجی انتہائی خفا نظر آ رہی ہیں۔ انھوں نے 8 ستمبر کو ترنمول کانگریس کے خصوصی اجلاس کو خطاب کرتے ہوئے کہا کہ ’’مجھے برا لگتا ہے کہ وہ اب دہلی میں نیتا جی کی مورتی بنا رہے ہیں۔ پہلے سے موجود مورتی کے بارے میں کیا؟ مجھے ایک انڈر سکریٹری کا خط ملا ہے جس میں کہا گیا ہے کہ وزیر اعظم آج مجسمہ کا افتتاح کریں گے اور پروگرام شروع ہونے سے پہلے آپ وہاں آ جائیں۔ کیا میں ان کی بندھوا مزدور ہوں۔‘‘

واضح رہے کہ وزیر اعظم نریندر مودی آج سنٹرل وِسٹا ایونیو کا افتتاح کریں گے۔ ساتھ ہی وہ انڈیا گیٹ کے پاس نیتاجی سبھاش چندر بوس کے ایک عظیم الشان مجسمہ کی رونمائی بھی کریں گے۔ رونمائی تقریب وزیر اعظم کے ذریعہ سنٹرل وِسٹا ایونیو پروجیکٹ کے افتتاح کا حصہ ہوگا۔ اس موقع پر پی ایم مودی کرتویہ پتھ (پرانا نام راج پتھ) کا بھی افتتاح کریں گے جو راشٹرپتی بھون سے انڈیا گیٹ تک پھیلا ہے۔

بہرحال، ٹی ایم سی کے خصوصی اجلاس میں ممتا بنرجی نے بنگلہ دیش کی وزیر اعظم شیخ حسینہ کے دورۂ ہند کو لے کر بھی مرکزی حکومت کی تنقید کی۔ انھوں نے کہا کہ یہ پہلی مرتبہ ہے جب بنگلہ دیش کی وزیر اعظم ہندوستان آئیں اور مجھ سے ملنے کی خواہش کے باوجود بنگال نہیں آئیں۔ ممتا بنرجی نے کہا کہ ’’بنگلہ دیش کی وزیر اعظم شیخ حسینہ سے میرے بہت اچھے روابط ہیں، لیکن مرکزی حکومت نے ہندوستان کے ان کے سرکاری دورہ کا حصہ بننے کے لیے مجھے مدعو نہیں کیا۔ مجھے نہیں پتہ کہ وہ (بی جے پی) اتنے غصے میں کیوں ہیں۔ انھوں نے مجھے پروگرام میں شامل ہونے کے لیے شکاگو اور چین سمیت کئی مقامات پر جانے نہیں دیا ہے۔‘‘