اکھلیش کی گورنر یو پی سے ملاقات، خراب نظم ونسق پر مداخلت کا مطالبہ

لکھنؤ: سماج وادی پارٹی سربراہ و ریاست کے سابق وزیر اعلی اکھلیش یادو نے سنیچر کو اترپردیش گورنر رام نائیک سے ملاقات کر کے ان کی توجہ ریاست کے خراب نظم و نسق کی جانب مبذول کرا کے اس میں ان سے مداخلت کی اپیل کی۔ یادو نے پارٹی کے دیگر لیڈروں جن میں قانون ساز اسمبلی میں اپوزیشن لیڈر احمد حسن بھی شامل تھے کے ہمراہ گورنر سے ملاقات کی اور ان کو ریاست کے نظم و نسق کی خامیوں اور دن بہ دن خواتین کے خلاف بڑھتے جرائم کے بارے میں آگاہ کیا۔

گورنر سے تیس منٹ کی ملاقات کے بعد ایس پی سربراہ نے راج بھون کے باہر میڈیا اہلکار سے بات کرتے ہوئے کہا’’ گورنر ریاست میں نظم ونسق کے معاملے میں ایس پی حکومت کے میعاد کار میں بھی مداخلت کیا کرتے تھے اور اب بھی کرنا چاہئے۔انہیں ریاست کی بی جے پی حکومت کو ہدایت دینی چاہئے کہ وہ بدحال ہوتے نظم و نسق کو چست درست کرے‘‘۔

یادو نے کہا کہ جرائم پیشہ افراد بے خوف ہیں اور وہ اس حکومت کے میعا د کار میں من چاہا کام کررہے ہیں۔ ایک بار کونسل کی نومنتخب خاتون صدر کو اس کے آفس میں گولی مار دی جاتی ہے جبکہ کریمنل افراد کو جیل میں ہی گولی ماری جارہی ہے۔ کس طرح سے لوگ وکلاء کے آفس اور جیل کے اندر بندوق لے کر پہنچ جاتے ہیں۔

ایس پی صدر نے ریاست میں خراب ہوتے لا اینڈ آرڈر کی صورتحال کے لئے ریاست کی یوگی حکومت کو مورد الزام ٹھہراتے ہوئے کہا کہ وہ ریاست کے لوگوں میں اعتماد پیدا کرنے میں مکمل طور سے ناکام رہے ہیں۔ یادو نے کہا کہ میٹنگ کے دوران اضلاع میں یادو ڈی ایم یا ایس ایس پی ہونے کے مسئلے کو بھی اٹھایا اور سوال کیا کہ کیا کوئی بھی ضلع میں یادو ڈی ایم یا ایس ایس کا نام بتا سکتا ہے۔

انہوں نے رامپور میں سینئر ایس پی لیڈر اعظم خان کو انتطامیہ کے ذریعہ ہراساں کئے جانے کے مسئلے کو بھی اٹھا یا۔اس ضمن میں ان کا کہنا تھا کہ اعظم خان کے ساتھ انتظامیہ کے ذریعہ کی گئی بدسلوکی ترش رویہ کے معاملے میں بھی گورنر جلد ہی نوٹس لینا چاہئے۔ یادو نے الزام لگایا کہ خان کو ہراساں کرنے کی نیت سے ان کے خلاف بے بنیاد مجرمانہ مقدمے درج کئے گئے ہیں۔ قابل ذکر ہے کہ اترپردیش میں سابقہ اکھلیش یادو کی کی حکومت کو خراب نظم ونسق اور دیگر انتظامی امور سے متعلق معاملوں میں گورنر کئی بار دخل دیتے ہوئے اپنی ناراضگی کا اظہار کیا تھا۔