رام ولاس پاسوان کے انتقال سے مودی حکومت میں اب اتحادی جماعتوں سے صرف ایک وزیر

نئی دہلی: صارفین امور اور خوراک و رسد کے وزیر رام ولاس پاسوان کے انتقال سے مودی حکومت کابینہ میں اب اتحادی جماعتوں سے کوئی وزیر باقی نہیں رہ گیا ہے۔ وزرا کونسل میں اتحادی جماعتوں سے محض رام داس اٹھاولے ہی وزیر مملکت ہیں جوکہ آر پی آئی (اے) سے تعلق رکھتے ہیں۔ رام داس اٹھاولے وزیر برائے سماجی انصاف و تفویض اختیارات ہیں۔

شیو سینا نے گزشتہ نومبر این ڈی اے کو خیرباد کہہ دیا تھا۔ جس کے بعد پارٹی لیڈر اروند ساونت نے کابینہ میں بھاری صنعت کی وزارت سے استعفیٰ دے دیا تھا۔ جبکہ اس سال ستمبر میں شرومنی اکالی دل کی ہرسمرت کور نے بھی کابینہ سے استعفی دے دیا۔ بعد میں اکالی دل بھی این ڈی اے سے علیحدہ ہو گئی۔

این ڈی اے میں ایک درجن سے زیادہ جماعتیں ہیں لیکن جے ڈی یو جیسی بڑی جماعت بھی مرکزی وزرا کونسل میں شامل نہیں ہے۔ پاسوان وزیر ہونے کے علاوہ دو اہم سیاسی امور اور پارلیمانی امور کی کابینہ کمیٹیوں کے رکن بھی تھے۔

لوک جن شکتی پارٹی (ایل جے پی) کے سینئر رہنما رام ولاس پاسوان کا جمعرات کے روز اسپتال میں انتقال ہو گیا تھا۔ وہ گزشتہ کچھ وقت سے علیل چل رہے تھے۔ پاسوان کے دل کی سرجری انجام دی گئی تھی جس کے بعد وہ زندگی کی جنگ ہار گئے۔

پانچ جولائی 1946 کو گھگڑیا ضلع کے شاہربنی کے ایک دلت کنبہ میں پیدا ہوئے رام ولاس پاسوان کا شمار بہار ہی نہیں بلکہ ملک کے قدآور لیڈران میں ہوتا تھا۔ جے پی (جے پرکاش نارائن) کے دور میں وہ ہندوستانی سیاست میں ابھرے تھے۔ بہار انتخابات میں نتیش سے ناراضگی کے بعد چراغ پاسوان نے این ڈی اے سے علیحدہ انتخابات لڑنے کا اعلان کیا ہے۔ حالانکہ انہوں نے وزیر اعظم مودی کی قیادت پر اعتماد برقرار رکھا ہے۔