مہاراشٹر: والد نے جڑواں بیٹیوں کا گلا کاٹ کر قتل کر دیا، پھر خود کو پولیس کے حوالے کر دیا

مہاراشٹر کے ضلع بلڈھانہ سے ایک سنسنی خیز واقعہ سامنے آیا ہے، جہاں ذہنی تناؤ اور کشمکش میں مبتلا ایک باپ نے اپنی تقریبا پانچ سالہ جڑواں بیٹیوں کو قتل کردیا۔ یہ واقعہ 21 اکتوبر کو اس وقت پیش آیا جب راہل چوہان اپنی بیوی اور دو بیٹیوں کے ساتھ بائک پر ضلع واشم کے روئیگوستا گاؤں جا رہے تھے۔ راستے میں میاں بیوی  کے درمیان جھگڑا ہو گیا جس کی وجہ سے بیوی گاڑی چھوڑ کر اپنے والدین کے گھر  پیدل نکل گئی۔

اس واقعہ سے مشتعل ہوکر راہل چوہان اپنی دو بیٹیوں کو بلڈھانہ ضلع کے اندھیرا گاؤں کے قریب ایک ویران علاقے میں لے گیا اور ان کا گلا کاٹ کر قتل کردیا۔ قتل کے بعد راہل نے خودکشی کا سوچا، لیکن بعد میں اس نے اپنا جرم تسلیم کیا اور ہفتہ کو ضلع واشم کے اسیگاؤں پولیس اسٹیشن میں خودسپردگی کر دی۔

پولیس نے ملزم کو حراست میں لے کر جائے وقوعہ پر پہنچ کر لاش برآمد کر لی۔ لاشوں کی بدبو اور گلنے سڑنے سے صاف ظاہر ہوتا تھا کہ قتل کچھ عرصہ قبل ہوا تھا۔ دونوں لاشیں پوسٹ مارٹم کے لیے بھیج دی گئیں۔ پولیس نے ملزم باپ کے خلاف قتل کا مقدمہ درج کر کے مزید تفتیش شروع کر دی ہے۔

معلومات کے مطابق راہل چوہان پونے میں ایک پرائیویٹ کمپنی میں کام کرتا تھا اور دیوالی پر اپنے خاندان کے ساتھ اپنے گاؤں جا رہا تھا۔ اس کی بیوی کے ساتھ جھگڑے نے اسے ذہنی طور پر متاثر کر دیا تھا جس سےاس نے یہ ہولناک قدم اٹھایا۔