’بھارت جوڑو یاترا‘ کو بالی ووڈ کا بھی مل رہا ساتھ، پوجا بھٹ اور سوشانت سنگھ کے بعد ریا سین بھی پدیاترا میں شامل

کانگریس کی ’بھارت جوڑو یاترا‘ کا آج 71واں دن ہے۔ راہل گاندھی کی قیادت میں بھارت جوڑو یاترا اب تک 1550 کلومیٹر سے زیادہ کا سفر طے کر چکی ہے۔ راہل گاندھی نے آج مہاراشٹر کے واشم ضلع کے پاتور سے پدیاترا کی شروعات کی۔ اس دوران راہل گاندھی کے ساتھ کانگریس کارکنان کا ہجوم دکھائی دے رہا ہے۔ دلچسپ بات یہ ہے کہ یاترا کو لگاتار بالی ووڈ کا بھی ساتھ مل رہا ہے۔ بالی ووڈ اداکارہ اور فلمساز پوجا بھٹ، اداکار سوشانت سنگھ کے بعد اب اس پدیاترا کا حصہ اداکارہ ریا سین بھی بنیں۔

قابل ذکر ہے کہ کانگریس کی بھارت جوڑو یاترا ان دنوں مہاراشٹر میں ہے۔ یہ یاترا تمل ناڈو، کیرالہ، آندھرا پردیش، کرناٹک اور تلنگانہ سے گزرتے ہوئے فی الحال مہاراشٹر میں ہے۔ مہاراشٹر میں ’بھارت جوڑو یاترا‘ کا آج گیارہواں دن ہے۔ اب تک یہ یاترا چھ ریاستوں کے 28 اضلاع سے گزر چکی ہے۔ یاترا مہاراشٹر کے بعد مدھیہ پردیش، راجستھان، دہلی، اتر پردیش، ہریانہ اور پنجاب سے ہوتے ہوئے جموں و کشمیر پہنچ کر ختم ہوگی۔

واضح رہے کہ مہاراشٹر میں بھارت جوڑو یاترا کو لوگوں کا زبردست پیار مل رہا ہے۔ بالی ووڈ اداکارہ اور فلمساز پوجا بھٹ بدھ کے روز راہل گاندھی کے ساتھ بھارت جوڑو یاترا میں شامل ہوئیں۔ دونوں ایک ساتھ پیدل چلے اور کئی مسائل پر گفت و شنید کی۔ پوجا بھٹ اور راہل گاندھی کی تصویر کانگریس کی طرف سے سوشل میڈیا پر پوسٹ کی گئی اور لکھا گیا ’’ہر روز نئی تاریخ رقم کی جا رہی ہے، ہر روز ملک میں محبت چاہنے والوں کی تعداد بڑھ رہی ہے۔‘‘

گزشتہ ہفتہ بالی ووڈ اداکار سوشانت سنگھ بھی کانگریس کی بھارت جوڑو یاترا میں شامل ہوئے تھے۔ انھوں نے اسٹیج سے بغیر نام لیے بی جے پی کو تنقید کا نشانہ بھی بنایا تھا اور کہا تھا کہ نفرت تو تمام لوگ پھیلا رہے ہیں، لیکن محبت کی راہ مشکل ہوتی ہے۔