اداکارہ پرینکا چوپڑا نے کسان تحریک کی حمایت کرتے ہوئے کسانوں کو بتایا ’غذائی سپاہی‘

ممبئی: اداکارہ پرینکا چوپڑا نے متنازعہ زرعی بل کو لیکر جاری کسانوں کے احتجاج کی حمایت کی ہے۔ انہوں نے پنجابی اسٹار دلجیت دوسنج کے ٹوئٹ کو دوبارہ شیئر کیا ہے اور اس مسئلے کے فوری حل کیے جانے کا مطالبہ کیا ہے۔ اپنے ٹوئٹر پیغام میں انہوں نے لکھا ہے کہ ’’ہمارے کسان ہندوستان کے غزائی سپاہی ہیں۔ ان کے خدشات کو ختم کرنے کی ضرورت ہے۔ ان کی امیدوں کو پورا کرنے کی ضرورت ہے۔ ایک فروغ پذیر جمہوریت کی حیثیت سے، ہمیں یہ یقینی بنانا ہوگا کہ اس بحران کا حل جلد سے جلد حل ہو جائے۔‘‘

واضح رہے کہ پرینکا چوپڑا ان چند بالی ووڈ اسٹار میں شامل ہو گئی ہیں جنھوں نے کسانوں کے احتجاج کی حمایت کی ہے۔ پنجابی فلم انڈسٹری سے وابستہ فلمی ادکاروں کی ایک بڑی تعداد گزشتہ کئی دنوں سے کسانوں کے معاملے کو لے کر کبھی سڑکوں پر تو کبھی سوشل میڈیا کے توسط سے اپنی حمایت جاری رکھے ہوئے ہیں۔