کانپور میں راکھی منڈی کے بعد کھاڈے پور واقع گودام میں لگی خوفناک آگ، کئی گھر بھی نذرِ آتش

کانپور شہر میں آگ لگنے کے 2 واقعات سے افرا تفری کا ماحول پیدا ہو گیا ہے۔ پہلے راکھی منڈی میں 25 کباڑ کے گودام سمیت کئی گھروں میں آگ لگ گئی، اور پھر کچھ گھنٹوں بعد خبر آئی کہ کھاڈے پور میں بھی پلاسٹک گودام میں آگ لگنے سے کافی مالیت کا نقصان ہوا ہے۔ فائر بریگیڈ کی گاڑیاں جائے وقوع پر پہنچ کر آگ بجھانے کی کوششوں میں مصروف ہو گئی ہیں، لیکن کھاڈے پور گودام میں اب بھی آگ کی لپٹیں دیکھنے کو مل رہی ہیں۔

میڈیا رپورٹس کے مطابق افیم کوٹھی کے پاس راکھی منڈی میں بدھ کی علی الصبح شارٹ سرکٹ کی وجہ سے تقریباً 25 کباڑ کے گوداموں اور گھروں میں آگ لگ گئی۔ مختلف فائر اسٹیشن سے فائر بریگیڈ کی 10 گاڑیاں آگ بجھانے پہنچیں اور تقریباً 4 گھنٹے کی سخت مشقت کے بعد آگ پر قابو پایا جا سکا۔ بتایا جا رہا ہے کہ صبح تقریباً 4.30 بجے ایک گودام میں آگ لگی تھی، جو دھیرے دھیرے دیگر گوداموں تک پھیل گئی۔ جب تک کوئی سمجھ پاتا، اس آگ نے خوفناک شکل اختیار کر لی۔ اچھی بات یہ رہی کہ آگ لگنے کے اس واقعہ میں کوئی جانی نقصان نہیں ہوا ہے۔ کچھ لوگوں کی چیخ پکار سن کر دیگر لوگ جا گئے، اور گھروں و گوداموں سے باہر نکل گئے۔

راکھی منڈی میں آگ نے خوفناک صورت اس لیے اختیار کی کیونکہ وہاں کباڑ کا سامان بڑی تعداد میں جمع تھا، جس نے تیزی سے آگ پکڑ لی۔ اس واقعہ میں کباڑ کے 5 گودام پوری طرح سے جل گئے۔ آگ لگنے کی وجہ شارٹ سرکٹ بتائی جا رہی ہے، لیکن تحقیقات بھی شروع کی جا چکی ہے تاکہ کوئی دیگر وجہ ہو، تو سامنے آ جائے۔

دوسری طرف ہنومت وِہار کے کھاڈے پور میں چل رہے پلاسٹک کے گودام میں آگ لگنے سے افرا تفری کا ماحول پیدا ہو گیا۔ ہنگامہ برپا ہونے کے بعد سبھی ملازمین گوداموں سے باہر نکل گئے۔ یہ آگ کیوں لگی، اس سلسلے میں فی الحال کچھ بھی پتہ نہیں چل سکا ہے۔ پہلی کوشش آگ پر قابو پانے کی ہے، جس میں ابھی کامیابی نہیں مل پائی ہے۔ حالات بہتر ہوتے ہی اس حادثہ کی تحقیقات بھی شروع ہو جائے گی۔