عدالتی جانچ کمیشن کی 3 رکنی ٹیم سنبھل کے دورہ پر، سروے کے دوران ہوئے تشدد کی وجوہات کی ہوگی جانچ

اتر پردیش کے سنبھل میں 24 نومبر کو ہوئے تشدد کی جانچ کے لیے ریاستی حکومت کے ذریعہ تشکیل تین رکنی عدالتی جانچ کمیشن کے 2 اراکین ہفتہ کو مراد آباد پہنچے جو اتوار (یکم دسمبر) کو سنبھل کا دورہ کر رہے ہیں۔ کمیشن کی یہ ٹیم 4 نکات پر جانچ کرنے والی ہے۔ اس کے تحت درج ذیل نکات شامل ہیں:

• کیا تشدد کسی سازش کے تحت منصوبہ بند تھی؟

• کیا پولیس تحفظ کے انتظامات ٹھیک تھے؟

• کن وجوہات سے اور کن حالات میں تشدد ہوا، اس کی وجہ کیا تھی؟

• آگے مستقبل میں ایسے واقعات نہ ہوں اس کے لیے کیا اقدامات کیے جا سکتے ہیں۔

'اے بی پی لائیو' کی خبر کے مطابق مراد آباد کے ڈویژنل کمشنر آنجنئے کمار سنگھ نے اس سلسلے میں بتایا "کمیشن کے دو رکن ہفتہ کو مراد آباد پہنچے۔ تیسرے رکن اتوار کو سنبھل جاتے وقت ان سے ملاقات کرکے اپنا تعاون دیں گے"۔ آنجنئے کمار سنگھ نے آگے کہا کہ جانچ کمیٹی اپنا کام کرے گی، وہ طے کرے گی کہ کیا کرنا ہے، ہمیں صرف ان کی مدد کرنی ہے۔ تحفظ کے انتظامات کیے گئے ہیں، جس مقام پر وہ جائیں گے وہاں سیکوریٹی فورس تعینات کیے گئے ہیں۔ اس کے بعد وہ آئندہ کا لائحہ عمل طے کریں گے۔ جانچ کمیٹی کے مطابق ہی انتظامات ہوں گے۔ سنبھل کے حالات پر نگرانی کی جا رہی ہے۔

یوپی حکومت نے سنبھل معاملے کی جانچ کے لیے 28 نومبر کو تشکیل عدالتی کمیشن کو نوٹیفکیشن کی تاریخ سے 2 مہینے کے اندر اپنی جانچ پوری کرنے کی ہدایت دی ہے۔ واضح ہو کہ سنبھل میں کوٹ گروی علاقے میں شہر کی شاہی جامع مسجد کے عدالت کے حکم پر سروے کو لے کر ٹکراؤ کے بعد 4 لوگوں کی موت ہوگئی تھی جبکہ پولیس اہلکاروں سمیت کئی افراد زخمی بھی ہوئے تھے۔

یوپی کے ایڈیشنل سکریٹری (داخلہ) دیپک کمار کی طرف سے جاری نوٹیفکیشن کے مطابق سنبھل تشدد کے لیے تشکیل جانچ کمیشن کے چیئرمین الٰہ آباد ہائی کورٹ کے سبکدوش جج جسٹس دیویندر کمار اروڑہ ہیں۔ جبکہ دیگر اراکین میں سبکدوش آئی اے ایس افسر امت موہن پرساد اور سبکدوش آئی پی ایس افسر اروند کمار جین شامل ہیں۔